🌺 بسم الله 🌺 👈نحضرو المكونات اللازمة

🍴في إناء نحطو جميع المكونات الزبدة (من الأفضل نخرجوها قبل ، طرية برك ماشي ذايبة)، الزيت الماء،السكر،الخل و رشة الملح

نخلطو بالميكسور مليح حتى تطلع كيما المايونيز.و تقدرو تستخدمو باتور لكن الاحسن ميكسور و المهم تطلع مليح

نضيفو الفرينة بالتدريج و نلمو بيدينا بلا مانعجنو حتى نتحصلو على عجينة طرية كيما قلتلكم الفرينة نحاول المرة الجاية إن شاء الله نقيسلكم بالكاس

نشعلو الفور 180 درجة فالوقت لي نشكلو فيه لي تارتولات

بالنسبة للمول تاعي حجمهم كبير يديرولي 25 حبة إذا كانو صغار توصل ل 40 (لي عندها ميزان أنا نوزن حوالي 50غ -المول الكبير -)

كي نشكلوهم بصوابعنا نثقبوهم بالفرشيطة باه ميتنفخوش.📌و للأمانة أنا فبعض الأحيان حتى كون نثقبهم يتنفخو فالفور نولي نخرجهم و نزيد نثقبهم. 📌و متنساوش الأطراف أيضا اثقبوهم

🍴فالوقت لي يكونو يطيبو نوجدو الكريمة

نحطو في كصرونة الحليب و النشا و السكر و ندوهم على نار هادئة حتى يعقاد الخليط

نزيدو الزبدة و عطر الموز (أنا نشري لي جيو في قرعة صغيرة ب 10 آلاف تديرلكم كمية كبيييرة لأنو في كل مرة نخدمو بقطرة ولا زوج)

و نفرغوها في صحن و لا كاش حاجة باه تبرد بعد ما نغلفوها بورق شفاف (اكيد تا المطبخ)

و من جهة أخرى نطلعو الشونتيي مع الياغورت نقيسو الشونتيي بنفس الباطة تا الياغورت

🍴كي تبرد الكريمة جيدا نخلطوها شوي بالباتور و نزيدو الشونتيي بالشوي حتى يولي قوام كريمي و حاكم روحو

📌قادر متديلكمش الكمية تا الشونتيي كاملة لذلك ضيفوها بالتدريج 📌متكثروش التخلاط بالباتور باه متحبطش الكريمة

📌لي عندها سوبر كرام ذوق الموز تزين بيه (تخلطو مع الماء) 📌بالنسبة للعجينة تقدرو تجمدوها بصح منخلوهاش تطول و كي تعودو رايحين تستعملوها اجبدوها قبل باش تذوب