نبدا بسم الله ونجيب حفنة واسعة نحط فيها 3كيلات سميد متوسط رايح لناعم (اخذت الكيلة بعلبة الزبدة 250غ) ثم في كسرونة فرغت علبة الزبدة وحطيتها عالنار تذوب قليلا فقط ثم نطفي عليها النار

نحط علبة الزبدة العائلة في وسط السميد ونملأها جيدا بالزيت حتى يسيل السميد ونتوقف ونحط م ص ملح على جنب

نخلط الزبدة والزيت مع السميد ونبسسه جيدا باليد ثم نحط نفس الكيلة ماء مع م ك عسل تدفى ونبدا نضيفلو عالسميد ونجمع

نبسس السميد ونجمع العجينة دون عجنها ونغطيها ونخليها ترتاح انا خليت كمية قليلة من الماء

نرجع للغرس 600غ نعجنو جيدا بالزبدة او الزيت ونخليها جانبا بعد ما ارتاحت العجينة نرجع نعجنها واذا لقيتها تشربت الماء نزيد كمية الماء المتبقية ونقسمها على 2كرات

نجيب كيس بلاستيكي ونحل العجينة الأولى كما فالصورة ثم نحل كمية الغرس بنفس الطريقة ونحطو مباشرة فوق العجينة الأولى ونرجع نفتح الكرة الثانية على كيس بلاستيكي ونحطها فوق الغرس ونغلق جيدا من كل الجوانب ونطرحها بالحلال جيدا

نخليها ترتاح حوالي ربع ساعة ونقطعها كما فالصورة ونشكلهم جيدا باستعمال كوبات من الجوانب حتى نكمل كامل الكمية

نحط طاجين المسمن فوق طاجين الطين على طابونة على نار هادئة ونخليه يسخن ثم نبدا نحط حبات المبرجة او البراج(في منطقتنا الشرق الجزائري نقولولها البراج) نطيبها من الجهة الأولى ثم نقلبها تتحمر من الجهة الاخرى ونحطها في سينو حتى نكمل كامل الكمية

نخلي حبات البراج يبردو تماما ونمسحطهم بفوطة ناشفة ثم نقدمها في صحن التقديم