نحضر كل المكونات ونبدأ على بركة الله، في إناء واسع (قصعة او جفنة) نحط المارغرين ورشة الملح وقطرات من عطر الفاني مع الزبدة، السكر الناعم وحبة بيض نخلط بيدي مليح.
نصيحة: ✨يمكن خلط المكونات بالباتور (الضراب الكهربائي)

نضيف الزيت بالتدريج مع الخلط المستمر حتى يصبح المزيج كريمي.

نضيف جوز الهند ندخلو مع الخليط ثم نضيف المايزينة ندخلها مليح ونبدأ نلم بالفرينة (نغربلها بطبيعة الحال) ندخلها بأطراف الأصابع فقط.

حتى نتحصل على عجينة طرية وفي نفس الوقت متماسكة (نلموها فقط ما نعجنوهاش)، نغطي لعجينة ونحطها في الثلاجة الوقت اللي ننظف فيه مكان العمل تقريبا 10 دقيقة،.
ملاحظة: ✔في هاذ الوصفة ماستعملتش خمارة الحلويات.

نجيب قوالب على شكل لوزة كما هو موضح في الصور ندير كمية من العجين في الوسط نبسطها شوية بيدي ندير فوقها بلاستيك غذائي ونعاود نحط قالب فارغ ونضغط مليح هذه الطريقة تسهل عليا التشكيل وكل الحبات يجيو متساويين، كما هو موضح في الفيديو وننزع الزائد من العجين نكمل كل الكمية اللي عندي بنفس الطريقة، نحطهم فوق صينية ونبيكيهم بعود الشواء.

وندخلها للفرن المسخن مسبقا على درجة حرارة متوسطة، ما يديش الوقت في الطياب، كاين اللي حمرتهم بزيادة، كي يطيب الصابلي نديموليه ونحطهم فوق مشبك يبردو.

في هاذ الوقت نحضر الحشو اللي هو عبارة عن كريمة واجدة (كراكنافة بذوق جوز الهند والكنافة المقرمشة مزيج اكثر من رائع) ضفت عليهم جوز الهند وخلطت الكل جيدا حتى نساجمو المكونات.

نعمّر الفراغ بالحشو اللي حضرناه من قبل ونحاول نسوي السطح وإذا كان خص الحشو نضيف.

نحط حبة لوز في الوسط (وحدة ندير فيها لوزة ووحدة لا) وهكذا حتى نكمل كل الكمية اللي عندي، ونلاقي كل زوج حبات مع بعض كما هو موضح في الصور، ونخليهم بجيه.

نروح نوجد القلاصاج: ذوبت الشكولا البيضاء بذوق جوز الهند (La saveur) في حمام مائي وضفت عليها 2 ملاعق زيت خلطت جيدا حتى انساجمت مع بعض، ثم ضفت اللوز المحمص ومرحي خشين
ملاحظة مهمة: ✔ كي نرحي اللوز لازم نفوتو بالغربال ندي الخشين فقط.

وبديت نقلاصي الحبات اللي عندي كما هو موضح في الفيديو ونحاول نتخلص من الفائض من الشكولا قدر المستطاع ونحطهم فوق صينية مغلفة ببلاستيك غذائي او ورق الزبدة.

بنفس الطريقة حتى نكمل كل الكمية اللي عندي وقبل ما تنشف نحط في الوسط نصف حبة لوزة محمصة وفي الجنب القليل من الورق الذهبي لكسر اللون فقط يمكن الإستغناء عنه، والتزيين دائما يبقى إختياري.

وقدّمتو بألف صحة وهنا 😋🥥😋

يجي بزاف بنين 😋وخصوصا لمحبي جوز الهند ذوقو يجي يشبه للرافايللو👌🏻، وشهية طيبة للجميع🥥😋🥥