نوجّد كل المكونات ونبدأ بإسم الله، في إناء حطيت الفرينة والسميد الرطب والخميرة والسكر وحليب بودرة والملح، وزرارع الخبز (مزيج بين السانوج، السمسم، زريعة الكتان وحبة حلاوة) نخلط النواشف مع بعض نضيف 2 ملاعق كبار زيت ندخلها مليح ونبدا نضيـف فـي الماء دافي بالتدريج مخلط مع ملعقة كبيرة خل.
ملاحظة: ✔كيّلت بغرفية الحريرة عطاتني زوج خبيزات متوسطين.

حتى نتحصل على عجينة خفيفة، خلطت مليح وبديت نضرب فيها كيما نديرو السفنج نهز العجين ونخبط حتى نتحصل على عجين منسجم يجي شوية خفيف ويلصق في اليد. في الأخير نضفت هاذيك الملعقة تاع الزيت اللي خليتها ندخلها مليح حتى يصبح السطح املس.

ونغطي الإناء ونخليها تخمر تقريبا 10 دقائق. كي تخمر نهبطلها لخمور (نديقازيها) نمسح يدي فقط (لخاطر راها لعجينة خفيفة وتلصق في اليد) نغطيها ونخليها تخمر على خاطرها للمرة الثانية (ممكن نكرر العملية لحتى 4 مرات على حساب الوقت المتوفر)، انا خليتها تخمر لثلاث مرات فقط.

وكي تخمر المرة الثالثة والأخيرة نديقازيها ونقسمها على زوج خبيزات.

نرمد القرصة في السميد الرطب مليح، ونحطها فوق ورق الزبدة يساعد بزاف لخاطر لعجينة تجي خفيفة.

نغطيها ونخليها 5 د ترتاح ونقرصها بسمك رقيق شوية ونغطيها بقطعة قماش ونخليها تطلع (تخمر) شوية في هاد الوقت نشعل على الطاجين (مقلاة حديدية ثقيلة) باش يسخن مليح ومن الأحسن نطيب المطلوع فوق الريشو (الطابونة).

نهز الخبزة بمساعدة ورق الزبدة ونحطها فوق الطاجين ونغلق عليها ونخليها تنشف.

كي طيب من تحت نقلبها ونخليها تتحمر مرة على مرة ندرج الخبزة باش تدي لون موحد، بنفس الطريقة نكمل الخبيزة الثانية، والخبيزة اللي طيب نحطها فوق مشبك.

ويقدم بألف صحة وهنا😋👌🏻😋.

يجي مجعب 👌🏻وخفيف بزاف👌🏻 وشهية طيبة للجميع👌🏻😋👌🏻.