لتعصيج اللحم : هتشوحى اللحمة الاول من غير اى دهون خالص هي دهونها كفاية علشان طعمها يبقى احلى واول مالونها يبقى رمادى ومابقتش حمرا تشيليها من الحلة وتحطى مكانها البصل او تحطى البصل عليها وتقلبى تقليبتين وتضيفى الفلفل الرومى

كمان تقليبتين وتحطى عصير الطماطم وتزودى عليها كوب ماء ساخن بيغلى (وهو ده السر الرهيب وهقولك ازاى بس تابعى)

كوب الماء الى ضيفتيه مش هيخليها تبقى عايمة في شوربة ولا حاجة انما ده مهم جدا في طريقتى

دلوقتى سبيبيها على نار قوية واول ماتغلى تهدى عليها النار وتسيبيها براحتها هي مش هتاخد اكتر من تلت الى نص ساعة

اول ماترفعيها من على النار ضيفي عليها التوابل انا مش بحط اكتر من ملح وفلفل وقرفة وشوية بهارات لحمة

لما حرارتها تهدى شوية ضيفى عليها نص كوب من البقدونس المفروم ولو عندك كزبرة وشبت ضيفى من التلاتة كمية تساوى نص كوب

دلوقتى جينا للبشاميل : هتحمرى الدقيق في السمنة واول ما تحسى ان ريحته بقت احلى خدى بالك علشان مايتحرقش منك ويمرر الطبخة هتقومى ضايفة كمية اللبن الى عندك وتقلبى بمضرب سلك علشان مايكلكعش منك

باقي كمية السائل المطلوبة هتصفى سوائل اللحمة المفرومة وهى دى السر الرهيب الى فعلا بتنقل البشاميل لمنطقة بعيدة اوى في الطعم تاخدى السوايل دى وتضيفيها على البشاميل وتحطى اى اضافة تانية عاوزاها كريمة او جبنة واول مايغلى ترفعيه عن النار

امى الله يديها الصحة اول ما يغلى البشاميل من الجوانب ترفعه وتضيف بيض وتقلب بسرعة جدا بمضرب سلك علشان البيض يستوى ومش يبان وبصراحة برده اضافة روعة بس تضربى بسرعة علشان البشاميل يبقى رايق ولو خايفة الغى الخطوة دى

ظبطى ملحك وفلفلك وتعالى نركب الصينية هتحطى معلقتين بشاميل على المكرونة المسلوقة علشان لما تقطعيها تلاقيها ماسكة روحها وتفردى نص المكرونة في صينية مدهونة وتحطى اللحمة وتحطى بقية المكرونة وعلى الوش هتجيبى بيضة تضربيها مع معلقتين قشطة بلدي وتظبطى الملح والفلفل وتمشيها على الوش

بصراحة مابحبش احط جبنة موتزاريلا المهم دخليها دلوقتى الفرن تحت على ارضية الفرن على حرارة 180 لمدة تلت ساعةوبعدها شغلى الشواية تاخد لون حلو وبالهنا والشفا

السر في طعم البشاميل لما تضيفى له مرقة وخصوصا المرقة الى اتصفت من اللحمة المفرومة بتبقى روعة واضافة الخضرة للحمة المفرومة بيديها طعم ولا اروع اما اضافة القشطة للبيض على وش الصينية بجد الى هيجربها هيحلف بيها وبالف هنا وشفا