في جفنة نحط السميد مع الملح نخلط جيداً ثم نشكل فتحة في الوسط ونحط الخميرة ونفرغ عليها الماء ونبدأ بالعجن حتى نتحصل على عجينة طرية وجارية نوعا ما يعني مشي كيما اي مثل البغرير وإنما أقل من ذلك لأنو سر هذا الخبز هو طراوة العجين

ملاحظة لي تخاف متقدرلوش تضيف ربع رطل فرينة مع السميد في البداية باش ادير الخيط وتقدر تقرص الخبز

نغطيه ونخليه مدة 5 دقيقة ونخبطو مليح ثم نكرر العملية 3 مرات ونخليه يختمر حتى يتضاعف الحجم نتاعو

بعد ذلك نقرصو يعني نحط يدي في الماء الساخن ثم نرفد العجين نشكلو كرة ونغطسها في السميد ونحطها فوق سميد مفروش

ثم نزيد نرش الخبزة مرة أخرى بالسميد ونبسطها بيدي على شكل دائري

نغطيها جيداً ونخليها ترتاح 10 دقيقة حتى تعاود تختمر من جديد ، ولازم الجو يكون دافئ باش متهبطلكمش الخميرة ويخسر الخبز وفي هذه الأثناء نشعل على الطاجين ونخليه يسخن مدة ارتياح الخبز

تأخذ سيار ونرفد الخبزة بطرشونة لي راهي فوقو يعني نرمي الخبزة في السيار كما هو موضح في الصورة نصفيها من السميد من جهة ثم نقلبها بين السماء والهواء ونصفيها من الجهة الأخرى

ثم نفرغ الخبزة من السيار ونحطها في يدي ثم نفتحها بيديا في زوج ونقلبها في يدي ثم نحطها في الطاجين ونخليها أطيب ونقلبها للوجه الثاني

بلاك تتحرق معاكم انا زوجي يحبها طايبة بهذا الشكل صراحة وانا نحبها أطيب صفراء وتقدم مع الأكل وشهية طيبة