اول حاجة هنفضل بين الجلد وعظم الصدر في الحمامة -بس بإيدك من غير سكينة علشان ما يتقطعش - واحدة واحدة لحد الرقبة.. و دايما اختاري الحمام متوسط علشان طعمه احلى وحجمه معقول.

بعد كدة هنخلط بصلة مبشورة مع ملعقة سمن وملح والفلفل الأسود ونتبل الحمام من جوة ومن برة.

هنقطع الكبد والقوانص حتت صغيرة.

هنشوح بصلة في السمنة لحد ما لونها يبداً يتغير.

هنضيف الملح وباقي التوابل والقوانص ونشوحهم مع بعض لحد ما القوانص تأخذ لون.

هنضيف الكبد ونقلب كويس ونضيف الرز مع الملح والفلفل الأسود والبابريكا والبهارات والقرفة.

هنحط نص مقدار الماء للرز ونهدي النار شوية.. لما يشرب الماء نقفل عليه ونسيبه يبرد.

أحشي الحمامة كانك بتملي كباية ماتزوديش رز عن كدة لأنه حجمه هيزيد.. بالنسبة للحشو بين الجلد وعظم الصدر أحشي في الجنبين بس وعند الرقبة وافردي الحشو بأيدك بطول الحمامة واقفليها زي الصورة.

اغلي الماء مع ملح وفلفل اسود وبهارات وجزر وبصل وورق لوري واسلقي الحمام من 30: 35 دقيقة.

هنقلب ملعقة صغيرة فلفل اسود مع ربع كباية لبن وندهن الحمام بعد ما يبرد.

آخر حاجة هنجمعهم في السمنة او سمنة على زيت.. وبالهنا والشفا.

ملحوظة: لو هتستعملي كوبين رز هيفضل شوية بعد ما تحشي ضيفي عليهم شوية مية او شوربة من الحمام وبيستوي عادي.