نبدأ على بركة الله، في طنجرة الضغط نحط البصلة مقطعة قطع صغيرة مع قطعة لحم الغنمي (الخروف) والزيت والسمن وحبة الطماطم مقطعة على ربعة، نضيف التوابل (الملح، فلفل الأسود، الكركم ورشة خفيفة من الزعفران) مع 5 أعواد قرنفل وعود قرفة نقلي الكل جيداً على نار متوسطة إلى هادئة (لازم ندي وقتي في التقلية باش يجي بنين) ثم نضيف كمية من الماء غالي حوالى كاس ونغلق على الطنجرة ونحط الصفارة ونخليه يطيب على خاطرو تقريبا ساعة.

كي يطيب اللحم نضيف رشة من سكنجبير ونخليه فوق النار مدة 5 دقائق.

في هاد الوقت نكون حطيت حبات البرقوق في صحن وغمرتو بالماء سخون باش يطرى، في كاسرونة صفيت القليل من المرق اللي طاب فيه اللحم زصفت عليه البرقوق بعد ما صفيتو وحطيتو على نار متوسطة.
ملاحظة: ✔ يمكن إضافة البرقوق حسب الرغبة وحسب أفراد العائلة.

ضفت السكر وعود قرفة حتى طاب البرقوق وانتفخ والمرق نقص طفيت عليه وضفت قطرات من ماء الزهر المركز.

في هاد الأثناء نوجد اللوز، في كاسرونة صغيرة نغلي شوية ماء نرمي عليه اللوز ونطفي نخليه حوالى 5 دقائق ونفسخو نشفو من الماء ونحطو في مقلاة فيها شوية زيت وزبدة تكون باردة ونحرك حتى يدي لون ذهبي جميل ما لازمش نسهى عليه هو بلخف يتحرق. كي يتقلى نحيه ونحطو في ورق ماص ونزين بيه الطبق.

عند التقديم، حطيت قطعة اللحم في صحن وفرغت عليه القليل من المرق من الأحسن نصفيه، وستفت حبات البرقوق.

ومـن فـوق رشّيت اللوز المحمص وقدّمت الطبق بألف صحة وهنا😘🌹😘 وشهية طيبة للجميع 🥰