نبدأ على بركة الله، في إناء نحط الفرينة مع الخميرة الخبز والسكر مع الحليب بودرة والملح نخلط الكل جيداً ونبدأ نضيف في ماء دافي بالتدريج كنت ضفت للماء ملعقة كبيرة خل (يعتبر كمحسن للعجين).
ملاحظة مهمة: ✔الكيلة اللي استعملتها هي غرفية متوسطة.

نخلي لعجينة مرخوفة وتلصق في اليد، نضربها مليح باش يدخلها الهواء مدة 5 دقائق، ثم نضيف الزيت

ندخلها مليح في العجينة نغطيها ونخليها تختمر مدة 15 دقيقة نعاود نديقازيها ونضربها شوية (هاذ العملية تنقص علينا الدليك)، ونخليها تختمر للمرة الثانية، يمكن نعاود هاذ المرحلة مرتين يعني نخليها تختمر ونهبط الخمور 2 مرات باش الخبز يجي خاوي من الداخل.

كي تختمر لعجينة نوجد السميد الرطب وين نقرص الخبيزات مع الماء دافي باش نمسح يدي. نديقازي لعجينة (نخرج الهواء) ونقسمها على زوج خبيزات

نرمدها في السميد الرطب، ونحطهم فوق ورق الطهي، كما هو موضح في الصور. نغطيهم ونخليهم يرتاحو مدة 5 دقائق.

نقرصهم مليح، نعاود نغطي عليهم ونخليهم يخمرو حولي 10 دقائق الوقت اللي تسخن فيه الكوشة (الفرن) كنت شعلتو من تحت ومن فوق باش تسخن مليح (استعملت فرن السعادة روعة في طهي الخبز).

كي تسخن الكوشة نرمي الخبزة الأولى بمساعدة ورق الطهي(نسحبها للصينية بلا ما نقلبها). نقص على الفرن من تحت أقل درجة ونخليه من فوق على درجة متوسطة.. نخليه يطيب يجي فارغ من الداخل نفس الطريقة طيبت الخبزة الثانية يدي لون ذهبي من فوق ولتحت إذا ما حمارتش الخبزة من تحت نقلبها تدي لون موحد (ما يديش وقت في الطياب تقريبا 10 دقائق فقط).

كي يخرج من الكوشة يكون شوية يابش نغطيه بقطعة قماش يولي رطب كي القطن، ويقدّم بألف صحة وهنا 😋👍🏻😋

يجي فارغ من الداخل وبزاف بنين 👌🏻😋👌🏻