نبدأ على بركة الله، غسلت مليح نص راش شوفلور (الزهرة) وقطعتو وحطيتو يفور مع القليل من الملح خليتو حتى طاب واستوى جيدا، فرغتو وهو سخون في قطعة قماش نضيفة وعصرتو مليح مليح باش نتخلص من الماء اللي فيه.

حطيتو في صحن وضفت عليه الأرز كنت سلقتو في القليل من الماء مملح خليتو طاب مليح مليح حتى أصبح معجن نوعا ما مع قطعتين من الجبن مثلثات و ملعقة كبيرة شابلور وملعقة كبيرة مزيج بين القصبر والمعدنوس كانو عندي في المجمد مطحونين وضفت التوابل (الفلفل السود، الكركم، سكين جبير مع تابل الجبن).
ملاحظة مهمة: ✔ماضفتش هنا الملح لأني سلقت الأرز في الماء والملح وكذلك كي فورت الشوفلور دردرت عليه القليل من الملح وتاني تابل الجبن مالح لذلك اسنغنيت عن الملح في التتبيلة.

خلطت الكل جيدا حتى انسجمت كل المكونات، درت كريات بحجم صغير كما هو موضح في الصورة.

رمدت الكريات في الفرينة متبلة كانت عندي من وصفة سابقة يمكن👈🏻 تفقد الطريقة من خلال هذا الرابط👇🏻، ثم البيض ثم الشابلور متبل حتى هو كنت حضرتو من قبل.

رمدتهم كلهم، فرغت القليل من الزيت في مقلاة خليتها سخنت شوية نقصت على نار خليتها متوسطة وحطيت الكريات مرة على مرة نحرك المقلاة.

حتى داو لون موحد، صفيتهم من الزيت وحطيتهم فوق ورق ماص.

وقدّمتهم مع صلصة الطماطم، وبألف صحة وهنا 😋👌🏻😋