نبدأ على بركة الله، في طنجرة الضغط نحط الزيت والسمن والبصلة المفرومة وقطعة اللحم مع التوابل (الملح، الفلفل الأسود، الكركم، سكنجبير (زنجبيل)، فلفلة حمرة) نقلي الكل جيداً ونضيف نص حبة متوسطة طماطم مقطعة على زوج نخليم يتقلاو مليح تقريبا مدة 5 دقائق على نار مهيلة، نمرقها بالماء غالي نحاول نفرغ على الجنب.
ملاحظة مهمة: ✔الكركم عندي مخلط مع القليل من زعفران.

نغلق على طنجرة الضغط ونخلي اللحم يطيب. كي يطيب (يستوي) نحيه ونحطو في كاسرونة مع شوية مرقة اللي طاب فيها (باش نقدر نحميه عند التقديم).
أما باقي المرق اللي في طنجرة الضغط نرمي فيه الجلبان ونغلق عليه حتى يطيب نص طياب.
نصيحة مهمة: ✨الماء اللي نمرقو بيه لازم يكون سخون بزاف (غالي) وتاني ما لازمش نكثرو بزاف باش المرقة ما تجيش سامطة.

نعاود نحل عليه ونضيف قطع القرنيع (القرنون) منقي ومغسول جيداً ومفور من قبل في هاذ المرحلة نغلق عليها بلا ما ندير الصفارة، كنت 👈🏻حطيت من قبل طريقة تحضيره ووضعه في المجمد يمكن تفقد الطريقة من خلال هذا الرابط 👇🏻
في الأخير نضيف رشة خفيفة من سكنجبير (زنجبيل) (زنجبيل) يعطيها ذوق هايــل نخليها تقريبا 5 دقائق تكتك ونطفي عليها تجي خاثرة وبزاف بنينة👌🏻.

ونقـدم الطبـق بالصحـة والهنـــاء😋وشهية طيبة للجميع 😋👌🏻😋