نبدأ على بركة الله، في طنجرة الضغط نحط البصلة مقطعة شرائح رقيقة مع غرفية خليط من البقوليات (الحمص، الفول، الجلبان اليابس، العدس واللوبيا) مرطبة بليلة من قبل كانو عندي في المجمد ضفت التوابل (الملح، الكركم، الفلفل الأسود، الفلفلة حمرة وسكين جبير) مع كرية صغيرة من الشحمة متبلة خلطت الكل جيداً ثم ضفت الخضرة (الطماطم، الجزر، البطاطا والكابويا الحمرا وفص ثوم) وقليتهم شوية على نار متوسطة.

نمرق بالماء يكون ساخن جداً ونغلق على الطنجرة وندير الصفارة ونخليها تقريبا 20 دقيقة، نفتح على الطنجرة نصيب الخضرة طابت نصفيها كما هو موضح في الفيديو ونحطها في إناء ونميكسيها بالبرا ميكسور. (كما يمكن طحنها في الآشوار).

نضيف على هاذ الخليط توابل العقدة (مكعب مرق الدجاج مع تابل خاص بالبركوكس، سكنجبير والكزبرة يابس مطحون) نعاود نميكسي الكل جيداً حتى تنسجم كل المكونات وعاود فرغتها على المرق اللي صفيناه من قبل.

في الأخير ضفت ملعقة كبيرة كزبرة أخضر مقطع رقيق كان عندي في المجمد، خلطت الكل جيداً وخليتها تعقد شوية على نار هادئة.

نغسل البركوكس جيداً بماء الحنفية ونخليه جانبا يستقطر حتى ينشف تماما، نميل القصعة باش نتخلص من الماء الزائد.
قبل ما نفورو ندهنو دهنة خفيفة بالزيت وعمرتو في الكسكاس وحطيتو يفور التفويرة الأولى.
ملاحظة: ✔البركوكس أو المردود اللي استعملتو مفتول باليد

كي فار قلبتو في القصعة وبديت نرشو بالماء (مانديرش الماء دربة وحدة لازم نديرو على دفعات) حطيت الملح حسب الذوق خلطت الكل جيداً ونخليه يتشرب مليح حتى يبرد.
ملاحظة: ✔الماء دا معايا كاس ونصف تقريبا

عاود نعمر البركوكس في الكسكاس ونحطو يفور للمرة الثانية.كي فار للمرة الثانية حطيتو في القصعة وحليتو بلا ما نرشو.
ملاحظة: ✔ فورتو مرتين فقط لأنو راح يكمل طيابو في المرق.

كي توجد المرقة نقص شوية في كاسرونة ونرمي عليها البركوكس ونخلط مليح، قبل ما نطفي ضفت السمن (دهان لعرب أو السمن البلدي) خلطت الكل جيداً تقريبا 5 دقائق وطفيت عليه.
ملاحظة مهمة: ✔ المرقة مانديرهاش كامل يمكن البركوكس ينشف نضيف من ذيك المرقة اللي نخليها بجيه.

فرغت في صحن التقديم وقدّمتو بألف صحة وهنا😋👌🏻😋

يجي بزاف بنين وما ياخدش وقت بزاف في التحضير، وشهية طيبة للجميع👌🏻😋👌🏻