نبدأ بإسم الله، اولا بالأرز، نغسلو مليح من ثلاث إلى أربع مرات بالماء بارد من الحنفية مع فركه بلطف باليد حتى يصفى لون الماء ويتم التخلص من نشا الأرز ونخليه يستقطر جيداً.
ملاحظة: ✔الكاس اللي كيلت بيه الأرز والماء سعته 200 ملل.

نقي الخضرة اللي عندي (الجزر والكوسة والبصل) نقطعهم قطع صغيرة بنفس الحجم ونخليهم بجيه، في كاسرونة نحط الزيت والزبدة (أو السمن) نخليها ذوب وتسخن شوية نضيف عليها البصلة.

نقليها مليح حتى تذبال ثم نضيف الجزر ونقليه حتى هو مليح وفي الأخير نضيف الكوسة (القورجات) حتى هي نقليها مليح على نار متوسطة إلى هادئة.

ثم في الأخير نضيف الأرز ونخلط جيداً حتى تتشمع كل حبات الأرز بالمادة الدهنية.

من بعد نضيف التوابل (الملح حسب الذوق، الكركم، فلفل أسود، الفلفلة حمرة، زعفران وتابل الأرز) ونخلط الكل جيداً.
نصيحة: ✨يمكن إستبدال تابل الأرز بالقصبر الناشف

نمرق بالماء يكون ساخن جداً نخلط الكل ونخليه يغلي على نار متوسطة مدة 10 دقائق ثم نقص للنار أقل درجة ممكنة (نار هادئة جداً) ونغلق الطنجرة بطبيعة الحال ونخليه يطيب على خاطرو مدة 10 دقائق أخرى، نطفي عليه ونخليه يكمل طيابو بالبخار فقط من 5 دقائق إلى 10 دقائق ويكون جاهز معانا.
ملاحظة:✔ لكل كاس أرز ضفت كأسين ماء.

ها هو وجد معانا الأرز يجي على حبة روعة روعة وبزاف بنين، من الأحسن في هاذ المرحلة نحركوه بالفرشطية (الشوكة).
نصيحة مهمة: ✨كي يتشمع الأرز في الأول مليح راه مايلصقش كيف ما كانت نوعية الطنجرة.

فرغت الأرز في إطار مربع باش يدي الشكل ومن فوق حطيت نص دجاجة مشوية جاهزة.

ونقدمو بألف صحة وهنا😋🍗😋يجي بزاف 😋 بنين، وشهية طيبة للجميع👌🏻.