نبدأ على بركة الله، نحضر أولا الشاربات أو السيرو باش يبرد مليح، في كاسرونة حطيت السكر مع الماء نخلط الكل جيدا ونحط تالكاسرونة فوق النار ونخليه يغلي مدة 10 دقايق.
ملاحظة: ✔سعة الكاس 200 ملل.

ونطفي عليه وهو دافي نضيف عليه قطرات من مركز عطر جوز الهند نخلط جيدا نخليه بجيه.

نحضر لوازم بديل الجنواز ونبدأ بإسم الله، في إناء نحط البيض مع رشة من الملح ونضرب مليح مليح حتى يبياض الخليط.

ثم نضيف السكر بالتدريج حتى يتضاعف الخليط ويصبح كريمي، من جهة أخرى نفرغ الزيت والحليب في كاس.

ونميكسيه جيدا حتى يصبح خليط متجانس ونضيفوه بالتدريج على الخليط مع الخفق المستمر.

ثم نضيف النواشف (الفرينة والنشاء وخمارة الحلويات) نغربلهم بطبيعة الحال ندخلهم بالسباتول فقط ونحاول نحافظ على الهواء اللي تكون من قبل وفي الأخير نضيف ملعقة كبيرة جوز الهند حتى هي ندخلها مليح.

نفرش الصينية بورق الزبدة ونفرغ الخليط نحاول نعلي يدي للفوق ونفرغ، نسوي السطح جيدا وندخلها للفرن المسخن مسبقا على درجة حرارة متوسطة مدة 15 دقيقة كافية.

كي طيب (تستوي) نقلبها على قطعة قماش ونحاول نحي ورق الزبدة بلطف ونعاود نجرعها لوجهها هاذ بديل الجينواز تجي خفيفة ورطبة ونقدرو نشكلو بيها حتى البسكوي رولي.

نخليها تبرد ونقطعها دوائر (تحصلت على 2 دوائر كاملة و2 أصناف تعطينا دائرة وبقايا الكيك استعملتو كطبقة حتى هو)، نخليها بجيه.

في هاذ الوقت نحضر كريمة الشونتي، في إناء حطيت كاس ونص بودرة الشونتي مع كاس ونص ماء بارد خلطت بالملعقة حتى انساجمت المكونات وضفت الحليب بودرة مع قطرات من مركز عطر جوز الهند دخلتها للمجمد مدة 10 دقائق وبديت نضرب فيها بالضراب الكهربائي حتى تضاعف الحجم إلى 3 أضعاف، كنت 👈🏻حطيت الطريقة من قبل بالتفصيل يمكن تصفحها من خلال هذا الرابط👇🏻
ملاحظة: ✔سعة الكاس اللي عبرت بيه 240 ملل

أصبح لونها ناصع البياض وكثيفة (استعملت بودرة الشونتي جيدة)، عمرت الكريمة في كيس حلواني لتسهيل عملية الحشو.
ملاحظة: ✔اكتفيت بحلاوة الشونتي فقط لم أضف السكر الناعم للكريمة.

حطيت قطعة الجينواز في قاعدة الدائرة وشربتها مليح بالشربات بذوق جوز الهند، درت الكريمة وسرحتها مليح ونحاول نزيد صاير داير الكريمة باش ما تخليش الحشو من بعد يخرج.

في الوسط حطيت الكراكونافة بذوق جوز الهند زادتلها بنة على بنة (تمد قرمشة خفيفة).

وعاود حطيت فوقها أصناف الجينواز وشربتها وحطيت الكريمة بنفس الطريقة سرحتها مليح كما هو موضح في الصورة.

وعاود حطيت في الوسط الكراكونافة ثم حطيت قطع الجينواز حاولت نستفهم مليح شربتهم وعاود ضفت الكريمة.

في الوسط حطيت الكراكونافة ثم حطيت من فوق قطعة الجينواز الأخيرة شربتها مليح وغلفتها بالكريمة سويت السطح جيدا ودخلتها للثلاجة مدة ساعة ونص باش الكريمة تحكم روحها مليح.
ملاحظة مهمة: ✔يمكن دخلوها للمجمد مدة 15 دقيقة.

خرجتها من الثلاجة نحيت القالب الدائري بلطف وغلفت الكيكة كامل الكريمة طبقة خفيفة، وحاولت ندير قطع من ورق الزبدة في القاعدة باش كي نرش جوز الهند ما يوسخش القاعدة.

وبديت ندردر جوز الهند على الجوانب جيدا، ثم تخلصت من الفواصل كما هو موضح في الفيديو.

ورشيت السطح كامل بجوز الهند كمرحلة أخيرة وعاود دخلتها للثلاجة حوالي 10 دقائق.

في هاذ الوقت حمصت رقائق اللوز على نار هادئة حتى اكتسبت اللون الذهبي (استعملت كمية قليلة فقط الباقي استعملتو في وصفة أخرى)
ملاحظة: ✔يمكن استعمال رقائق الفوق السوداني حتى هي تفي بالغرض.

وزينتها من فوق بكريات جوز الهند الجاهزة (شبيه الرافيللو) وصاير داير حطيت رقائق اللوز) تزيين بسيط وفي نفس الوقت أنيق.

منظرها يشهي 🥰🥥😋

حددت بالسكين القطع (عطاتني 8 حصص متوسطة)

وقطعتها جات الطبقات باينة وقدّمتها بألف صحة وهنا 🥥😋🥥

جات رطبة كي القطن وحلاوتها معتدلة، وشهية طيبة للجميع 🥰💐