نبدا بسم الله ونجيب رسبييون نحط فيه كيلة بياض بيض بدرجة حرارة المطبخ (كأس) ونضيف رشة ملح ونحضر كاس سكر عادي ثم نبدا نخلط بالخلاط الكهربائي حتى ببياض الخليط ثم نبدا نضيف السكر تدريجيا حتى نتحصل على ميرانغ ثقيل

بعد ما تحصلت على ميرانغ ثقيل نضيف عالخليط 2كأس كاكاو محمص ومرحي ونحطو عالميرانغ ونضيف كاس الاربع طحين وم ص خميرة الحلوى

نبدا نخلط من فوق لتحت حتى نتحصل على خليط نخليه على جنب ونجيب سينية فرن مقاسها 30/40 نفرشها بورق الطهي

نفرغ خليط الكاستال فالسينة ثم نوزعو على كامل السينية ثم نسويها جيدا بالكوبات ونشعل الفرن يسخن على درجة حرارة 180د ونطيبو من تحت ثم نشعل من فوق يتحمر قليلا

نحضر الكريمة نحط في رسبييون 200غ زبدة مع 3م ك سكر و3م ك كرام شانتي و2م ك زيت و2م ك قهوة باردة و2م ك حليب ونخلط جيدا بالخلاط الكهربائي

نخرج السينية من الفرن وننزع الكاستال من السينة ونقطع الحواف الاربعة ثم نقطع الورقة على جزئين متساويين

نحط القطعة الأولى فوق سينة ونحط كمية من الكريمة ونطليها جيدا ثم نحط القطعة الثانية

نطلي الطبقة الاخيرة بالكريمة ونسويها جيدا ثم نحط قطع من حواف الكاستال لي كنت فتتها قبل

ثم نضيف القليل من الكاكاو المحمص ومرحي ونرش سكر ناعم على كامل السطح

نحط السينة فالثلاجة ليلة كاملة او عالاقل 5ساعة ثم نخرجو ونقطع مربعات متساوية