نجيب حبات البرتقال قصيتلهم لحافة من فوق وشوية من تحت باش دير قاعدة، خويتهم بمساعدة الملعقة حتى نتحصل على برتقال فارغ من الداخل.

هذاك لب البرتقال وعصيره اللي تحصلت عليه فتته شوية باليد، ديت منه كيلة فرغتو في إناء (غسيبيون) ضفت عليه نصف كيلة بودرة الشونتيي مع نص كيلة كريمة الطازجة السائلة والسكر (يبقى حسب الذوق) مع رشة ملح و كريمة البرتقال (كانت عندي واجدة من قبل) وخلطت الكل بالباطور (الخلاط الكهربائي) حتى تحصلت على كريمة متماسكة. هاد الكيلة اللي استعملت عطاتني كمية من الكريمة لاباس بيها، الكمية اللي بقاتلي زينت بيها كيكة البرتقال.

كريمة البرتقال اللي كانت عندي من قبل فيها 2 كيسان عصير البرتقال مع 2 ملاعق كبار سكر و ملعقة ونصف نشاء خلط الكل بارد في بارد وحطيت الكاسرونة فوق النار حتى عقد الخليط طفيت عليها وضفت ملعقة صغيرة مارغرين خلطت مليح حتى نسجمت المكونات، ديت منها في هاذ الوصفة 2 ملاعق كبار.

عمرت الكريمة في جيب حلواني وملأت حبات البرتقال الفارغة وحطيت من فوق الحافة اللي كنت نزعتها من قبل، أنا قدمتهم هكذاك يمكن تزيينهم بوريقات النعناع.

تقدم بألف صحة وهناء.