نوجـد كل المكونات وعلى بركة الله، في إناء نحط كيلة البيض جاتني خمس حبات بيض وبياض حبة بيض أما الصفار خليتو للتلميع مع السكر ورشة ملح مع الفانيلا و نضرب الكل بالباتور (الضراب الكهربائي) حتى يذوب السكر.
ملاحظة: ✔الكيلة اللي استعملتها هي غرفية متوسطة الحجم

نضيف عليه الزيت بالتدريج مع التحريك المستمر ثم نضيف بشر البرتقال وبشر الليمون وقطرات من عطر الزبدة المركز مع الحليب غبرة (المجفف) ونعاود نخفق الكل جيدا.

نفرغ الخليط في إناء واسع باش يعاوني في لم العجين. ثم نضيف خمارة الحلويات مع النشاء (مايزينة) ونحرك غير بالسباتول حتى تتجانس المكونات.

ثم نضيف الفرينة (المغربلة بطبيعة الحال) نضيفها بالتدريج حتى نحصل على خليط يلصق شوية في اليد (ما لزمش تكون يابسة هي كي تريح تسهل علينا الخدمة).

نغطيها ببابي فيلم (بلاستيك غذائي) ونخليها ترتاح تقريبا 30 دقيقة، كي ترتاح نبدا نخدمها نحل العجينة بين زوج بلاستيك بسمك 01 سم تقريبا و نشكلها بالمراشم (الطوابع) حسب الرغبة.
ملاحظة: ✔لازم الطابع نرشوه بالفرينة باش ما تلصقش فيه العجينة

نستفو الحبات في صينية مفرشة بورق الزبدة من الأحسن، ندهن السطح بصفار حبة بيض مخلط مع الحليب والفانيلا ومن فوق ندردر شوية سكر

ندخل الصينية للفرن المسخن مسبقا على درجة حرارة متوسطة كي طيب من تحت نطفي عليها ونشعل عليها من فوق تدي لون موحد تجي مشققة ومين تكون طيب تمد رائحة جد جميلة.

ها هي واجدة عطاتني كمية لاباس بيها، الصينية اللي نخرجها من الفرن نحط الحبات فوق مشبك باش يبردو.
ملاحظة: ✔الكمية تبقى على حسب الكيلة المستعملة.

ويقدّم بالصحة والهنا 😋👌🏻😋

وشهية طيبة للجميع👌🏻😋👌🏻
نصيحة: ✨عائلتي يحبو حلوة الطابع مقرمشة على بيها نرقق العجين شوية أما إذا حبيتوها تجي طرية من الداخل حلوها شوية غليظة.