في إناء نضع كمية معتبرة من الفرينة (طحين) يعني انت وعينك ميزانك شحال تحبي تديري من خبزة نزيد الخميرة السكر السانوج (حبة البركة) نخلط الكل جيداً نظيف الملح وفالوسط ندير حفرة ونظيف الماء الدافئ

ونخلط بواسطة اليد كي شغل نضرب فيه حتى نتحصل على عجينة تلسق في اليد متخافيهاش ومتقوليش جاتني جارية دخلي يدك في الماء واقعدي تضربي فيها حتى تبانلك بلي ولات ملساء وتلسق نغطيها ونخليها تختمر

من بعد نديروا في صينية مدهونة بالزيت لانو علبالي معضم الاخوات معندهمش كوشة تاع التراب لي عندوا كوشة تاع التراب ميدهنش الصينية بالزيت وندخلوه للفرن يكون مسخن بدرجة حرارة عالية وكي يطيب (يستوي) يقدم مع حريرة او عدس كل واحد والذوق تاعو

كي تختمر المرة الاولى نهبطلها التخمار ونخليها تزيد تختمر والمرة الثالثة ندير يدي في الماء ونڨرسها عادي كي المطلوع ونرمدها فلاشابلوغ ماشي فالسميد وهدا هو السر باش يجيك خفيف من برا وهايل نغطيه ونخليه يخمر