هنغسل الفراخ كويس ونحط عليها خل ونسيبها تتصفى وبعدين هنحط عليها رشه ملح ورشه فلفل ورشه بابريكا وندمجهم مع بعض ونسيبهم شويه

هنقطع المشروم (الفطر) بتاعنا وهنقطع البصله ممكن شرايح وممكن نفرمها حسب الرغبه وهنفرم الثوم

هنجيب معلقتين دقيق ونحط فيهم الفراخ كأننا هنعلمها بانيه وبعدين هنحط ملعقة زبده كبيره وشويه صغيرين زيت ونقلي الفراخ وبعدين نسيبها على جنب

هنحط البصله في نفس الطاسه بتاعه الفراخ تأخذ لون شويه ومعاها الثوم المفروم اول ماياخدوا اللون هنحط المشروم (الفطر) لو احتاج نزيد زبده نحط تاني بس اول مانحط المشروم (الفطر) نهدي النار عشان بيستوى بسرعه جداً

هنحط ملعقة دقيق ونقلبها كويس في المكونات لغايه ماشكل الدقيق يختفي في الوقت ده هنضيف الكريمه اللباني شويه بشويه وهنحط عليها المرقه ونقلب لو حسينا انها تقيله اوي هنخفف شويه بشويه بكوب الماء اول ماتظبط معانا هنضيف الملح والفلفل و الثوم البودرة

بعد كده هنضيف الفراخ بتاعنا ونقلب كويس ندمجهم مع بعض وبعد كده هنحط الليمون وبعدين جوزه الطيب ولما نجي نقدمها نحط البقدونس من فوق زي الصوره بيفرق في الطعم على فكره مش مجرد تزيين