نحضر المكونات الأولية ونبدأ على بركة الله، نحمص السمسم ونحطو بجيه يبرد، نقطع الزبيب قطع صغيرة.
ملاحظة مهمة: ✔ الكاس اللي عبرت بيه سعته 200 ملل.

ونحمص حبة الحلاوة مع زريعة البسباس ونطحنهم، نقطع اللوز أو ندششو بدون ما نحمصو.

نطحن البندق اللي كنت حمصتو نطحنو خشين وهاهي كل المقادير واجدة.

نحط المارغرين في إناء واسع (قصعة) نضيف عليها السكر والزيت وعطر مركز الزبدة مع رشة الملح نخلط الكل بالسباتولا حتى تنسجم المكونات ثم نضيف حبة بيض كاملة وبياض حبة بيض أخرى أما الصفار نخليه باش ندهن الوجه من بعد.

نخلط الكل جيدا حتى يصبح الخليط كريمي، نضيف الزبيب، اللوز، السمسم، حبة حلاوة مع زريعة البسباس، البندق.

نخلط الكل بأطراف الأصابع فقط كما هو موضح في الفيديو، نضيف الخمارة مع القليل من الفرينة (نغربلهم بطبيعة الحال) ونخلط.

نبقى نضيف في الفرينة بالتدريج حتى نتحصل على عجينة رطبة ومتماسكة في نفس الوقت تشبه لعجينة الصابلي.
نصيحة: ✨ للحصول على قاطو مهوي من الأفضل نغربلو الفرينة، نغطيها ونخليها ترتاح الوقت اللي نضف فيه سطح العمل.

نحل العجينة بين زوج بلاستيك ونقطع الشكل اللي توفر.

نستف الحبات فوق صينية مفرشة بورق الزبدة ونحضر خليط الدهن، في غرفية حطيت صفار البيضة مع ملعقة كبيرة خل والقليل من القهوة سريعة الذوبان وخلطت الكل جيدا.

ندهن كل الحبات بالخليط المتحصل عليه.

ومن فوق نحط شرائح اللوز او القاوقاو وندخل الصينية للفرن المسخن مسبقا على درجة حرارة متوسطة كي يحمار من تحت نطفي عليه ونشعل من فوق يدي لون ذهبي موحد.

الصينية اللي طيب نحيها ونحط حبات القاطو فوق مشبك.

وهاهي ذي واجدة، قدّمتها بألف صحة وهنــا 😋👌🏻😋

تجي خفيفة 👌🏻ومقرمشة😋 روعة مع كاس قهوة حليب يا سلام 🥰 وشهية طيبة للجميع 🍪😋🍪