في جفنة، نحط 4 كيسان سميد متوسط ونجمعها بـ 2 كيسان إلا ربع ماء حتى نتحصل على عجينة ما تكون لا يابسة لا طرية بزاف

نحطها في كيس بلاستيكي وندخلها للثلاجة ليلة كاملة.
في الغد، نخرج العجينة ونبدأ نعجنها وندلكها مليح حتى تولي طرية، ناعمة وبيضاء  اللون.

بعدها نبدأ نضيف الماء بالتدريج:
ندخل يدينا في الماء وندلك العجينة بقبضة اليد، وما ننساش الملح.
(استعملت حوالى ربع كأس ماء دافئ)
نتحصل على عجينة طرية وتتلاصق.
نغطيها ونخليها ترتاح.

نحضر الخميرة:
في ربع كأس ماء دافئ نحط ملعقة كبيرة خميرة + ملعقة كبيرة سكر، نخلط ونخليها تتفاعل.

نضيف الخميرة للعجينة على دفعات، وندخلها بقبضة اليد حتى تولي العجينة مدلوكة مليح، تتلاصق وخفيفة.
✔️ هذا هو سر الخفة نتاع المطلوع

في الأخير نضيف ملعقة زيت او ملعقتين، ونشمخ يدينا légèrement بالماء (باش ما تلصقش) ونلم العجينة ونغطيها حتى تختمر.

بعد التخمير، نشمخ يدينا بالماء ونشكل كريات ونحطهم فوق ورق الطهي مرشوش بالسميد الرقيق.
نرش على الوجه سميد رطب ونبسطهم شوية.
نغطيهم ونخليهم يختمروا وفي نفس الوقت نسخن الطاجين مليح.

نحمل الخبزة بورق الطهي ونحطها فوق الطاجين ونغطيها.
كي تنتفخ وتنشف نحي الورق ونطيبها من الجهتين والاطراف.