بالباتور نضرب البيض والسكر والفانيلا حتى يصبح رغوي نضيف الزيت ونضرب ثم نضيف الياغورت ونخلط بالفووي باش مانهبطوش البيض نغربل الفرينة والكاكاو والخميرة ونخلط بالشوي. ندهن القدرة تاعي بالزبدة و نرش الفرينة ونفرغ الخليط وندخله لفرن ساخن. هاذي القدرة تاعي قديمة ماعندهاش يدين وإذا ماعندكش تقدري تستعملي تاعك ولكن لازم تغطيلها يديها بالبابي ألمينيوم باش ما يتحرقوش

بعد ما تطيب اي تستوي نخرجها من الطنجرة ونخليها تبرد ونغسل الطنجرة و ننشفها وندهنها مليح بالزيت أو الزبدة باش ما تلصقش الكريمة. ونحضر الكريمة

الكريمة نخلط المقادير بارد في بارد و نحطها فوق النار حتى تعقد ومنبعد نفرغها مباشرة فالقدرة ونحط عليها الكيكة كما كانت فالأول يعني كما طيبناها مانقلبهاش ونضغط عليها بصحن ثقيل ونحط فوقو حاجة ثقيلة باش يشد الشكل تاعها أنا حطيت كاس ماء معمر فوق الصحن ونخليها تبرد على مهلها ثم ندخلها للثلاجة حوالي ساعتين

كي نخرجها نحاول نكبها بلعقل وندور الموس على الجوانب. التزيين اختياري تقدري تزيني بالشكولاطا وبالصحة والعافية.ملاحظة المقادير تختلف حسب حجم الطنجرة تاعك و الذوق كذلك كما تحبوه