نضيف السكر الى البيض ونخفقهم سوة وبعدها نضيف الزيت وهم نخفقهم وبعدها راح تضيفون الهيل وهم تخفقوها خفقة خفيفة حتى يمتزج الهيل بالخليط...

ونجي للمرحلة ما قبل الاخيرة هاي المرحلة كلش حلوة وسهلة تحضرون الصواني وتدهنوها بالزيت او بالزبدة بواسطة الفرشاة وتحضرون كاسة الحليب السائل وكاسة السمسم وتبدون تسوون الاشكال اللي تريدوها وتغمسوها اول شي بالحليب وبعدها بالسمسم (او اذا عجبكم تنثرون السمسم على البقصم بالصينية بدون ما تطمسوها بكاسة البقسم حسب الرغبة) وبعدها تحطوها بالصينية

المرحلة الاخيرة... الاوفن او الفرن تشغلوه قبل ما تدخلون الصينية بخمس دقايق على درجة حرارة ٢٠٠ درجة مئوية والجوة فقط وبعدها من تدخلون الصينية تقللون درجة الحرارة لل١٨٠ درجة ليش ؟ لانه عجينة البقصم بيها بيكم باودر وينفش بالفرن فضروري درجة الحرارة تكون مضبوطة وبعد ال ١٠ دقايق يللة تكدرون تفتحون الفرن وتشوفوه من يستوي الجوة تشغلون الفوك بس حتى علمود يصير لونه ذهبي وخلص وراها طلعوها الصينية بس لا تشيلون البقصم رأسا لانه يتكسر حرامات وعوفوها تبرد فد ربع ساعة يللة تشيلوها وبحذر حتى تبقى محافظة على شكل

ملاحضات :
- اول شي الكوب اللي تقيسون بيه الطحين هو نفسه تقيسون بيه الزيت والسكر حتى لا يصير اكو اختلاف بالمقادير وتفشل العجينة
- ثاني شي بما انه البقصم بيه بيكم باودر فالاشكال اللي تسووها بالصينية حاولو متكون كبيرة سووها وسط او صغيرة لانه هية راح تنفش بالفرن وتاخذ شكلها الاعتيادي

وان شالله ماكون طولت عليكم وتعجبكم طريقتي و الف عافية 😍❤