في الاول بنحط حله الحمص ع النار ونحط فيها بصلايه متقطعه اربعه وطمطمايه وكمون ونص لمونه ومياه كافيه لسلق وتسويه الحمص.. وياريت يتعمل قبل عمل الكشري بساعتين مثلا لانه بياخد سوا

بنغسل العدس ونحطه في حله على النار معاه كوبايتين مياه ومعلقه صغيره كمون ونص معلقه ملح ومعلقتين خل ونشويه نص سوا ونشيله من النار

في حله كبيره بنحط مكعب زبده ونحمر الشعريه لحد ما يبقى لونها ذهبي بعدين ننزل بالرز ميكونش مغسول ولا منقوع يكون ناشف.. عشان لو غسلناه هينزل النشا وممكن يعجن مننا وهنقلبه مع الشعريه ونضيف عليه معلقه كمون وملح حسب الرغبه ونص معلقه صغيره كزبره لحد ما يبتدي يدخل في السوا والرز كله يكون اخد من الزبده وبيلمع كده ونضيف المكرونه الاسباجيتي ونكسرها على 3 ونقلبها في الرز والشعريه بعدين نضيف المكرونه الصغيره ونقلبها ولو احتاجت مكعب زبده نضيف.. نفضل نقلب لحد ما نلاقي المكرونه بالكامل اتغلفت بالزبده..

هنحضر لترين مياه مغليين وسخنين وندوب فيهم مكعبين مرقه

هنكون محضرين لترين مياه مغليين وسخنين فيهم مكعبين مرقه دجاج.. وننزل بيهم ع الرز والمكرونه والشعريه.. ونصفي العدس المستوى نص سوا ونضيفه عليهم ونضيف مكعب زبده ومعلقتين خل ونقلب ونوطي النار.. لحد ما المكونات كلها تستوي

اثناء ما الكشري بيستوي بنجهز الصلصه.. ننزل بشويه زيت عليهم الثوم مفروم ولما الثوم ياخد لون بننزل بمعلقه صلصه جاهزه كبيره ورشه خل ونص معلقه كزبره كبيره ونقلبهم وننزل بلتر الطماطم المعصوره المتصفيه ومكعب مرقه وملح حسب الرغبه ونص معلقه كمون ونقلب ونسيبها تستوي وتتقل

هنحضر الشطه الزيت باننا نضيف نص كميه الزيت ونقسم الطاسه 3 وفي جنب من الطاسه الطماطم المتقطعه صغيره وفي جزء تاني الفلفل الالوان ونسيبهم يدبلوا بدون تقليب ونهدي النار ولما يدبلوا نضيف معلقه الشطه البودر في الجزء الثالث من الطاسه ونبعد عنها عشان البخار وخمس دقايق ونطفي عليها ونضيف باقي كميه الزيت

نحضر البصل هنقطع البطل حلقات ونضيف عليه معلقه النشا ونصفيه من النشا الزياده ونسخن الزيت يكون غزير ونقلي البصل لحد ما يكون لونه دهبي نطلعه من الزيت على مناديل مطبخ

نحضر الدقه هنضيف الثوم المهروس وربع كوبايه عصير الليمون وربع كوبايه الخل ونحطهم في حاجه محكمه

تحضير الكشري كله هياخد اقل من ساعه ونص ومش دربكه وهنرتب الطبق زي الصوره وهيطلع تحفه وبالهنا عليكوا