في إناء نضع كأس ماء دافئ نضيف ليه خميرة الخبز والسكر ملعقتين الدقيق نخلط ونخليهم يتفاعلو خمس دقائق نضيف الملح الفرينة لي نكون غربلتها ونفرغ عليها خليط بعد ما يكون تفاعل ونبدا نضيف الماء ونجمع حتى نتحصل على عجينة طرية تتلصق نوعا ما نخبطها قليلا في الاناء تاعي يعني متل الطريقة التقليدية المستعملة مع السفنج والغرايف

بعدها نأخذ بياض البيض نضيف ليه خميرة الحلوى ونخلط حتى نتحصل على خليط ثلجي ندخلو في العجينة تاعي بطريقة الخبط دائما حتى يدخل في كامل العجين نغطيها ونخليها تختمر جيدااا حتى يضاعف الحجم

بعد ما يخمر نهبطلو الخمور ونعاود نخليه يخمر للمرة الثانية نهبط العجين وندهن سنيوة بالزيت ندهن يدي ونعمل كويرات بحجم حسب الرغبة نخليهم يرتاحو ربع ساعة نكون حطيت الزيت يسخن مقلاة أولى نضع قيمة ربع كأس زيت والمقلة الثانية زيت غزير نأخذ حبة نعمل فيها ثقب في وسط ثم نرفدها

ونبقى ندور فيها بيدي حتى يتوسع ثقب ومباشرة المقلة الأولى لي فيها كمية قليلة من زيت حتى تبدا تنضج من القاعدة نهزها المقلة الثانية اي فيها زيت بزاف نحطها على نفس الجهة لي كانت عليها وندورها في المقلة بواسطة ملعقة ونلوح عليها الزيت

أثناء عملية التدوير ممكن نستعمل عود شواء وندخلو في الثقب ونبقى ندور في الحبة تاعي في الزيت حتى تعمل هدوك نبايل