خلطي المارغرين ثم ضفي لها السكر وامزجهما حتى يذوب السكر بين يديك ثم ضفي البيض وخلطيه والان ساقترح عليك بعض الاشكال: 1 المشوك ضفي للبيض المعطر كعطر العسل واللوز ثم ضفي كمية من الفرينة والقليل من الكوكاو محمص ومرحي

ثم ضفي باكي خمارة وكملي لمي بالفرينة ثم شكلي كريات بحجم 30 غرام ثم رمديهم في بياض البيض المعطر ثم في الكوكاو مرحي خشين شوية ودخليهم يطيبو على 180 وغير يطيبو عسليهم مباشرة وقدميهم

الجلجلانية: احكمي العجينة وضفي باكي خمارة والقليل من الكوكاو محمص ومرحي ثم ضفي القليل من الجلجلان محمص ولمي بالفرينة ثم شكلي كريات ورمديهم في بياض بيض معطر ثم في الجلجلان محمص وشكلي مثلثات او حطيهم في مول السيليكون وطيبيها على 180درجة وكي طيب عسليها قيس ملعقة صغيرة لكل حبة وزينيها بالجولي أو حسب الرغبة

تشكيلة متنوعة مثلا: أ_ كي تلمي العجينة شكلي بيها صبيعات بحجم 30 غرام و طيبيهم ثم رمديهم في العسل ثم في القوفريط مرحي و قدميهم.

ب_شكلي كريات بحجم 30 غرام واحشيهم بالحلقومة و ديريهم على شكل تمرة وانقشيهم كما في الصورة وطيبيهم على 180 درجة وكي طيبو دردري عليهم السكر قلاسي.

ج_احكمي العجينة وحليها نوعا ما مربع كبير وطيبيها وكي طيب حطي فوقها الشكولاطة الذائبة وديري خطوط بالشكلاطة البيضاء وكي تنشف قسميها الى مربعات وقدميها

د_افتحي العجينة واطبعيها على شكل بيضوي او قلوب وطيبيهم و كي يطيبو ديريلهم الطلية وزيني حسب الاختيار او شكلي كريات 30غو طيبيهم واطليهم بالشوكولاطة

تقدري تشكليها اشكال اخرى كل وحدة تتفنن فيها

شهية طيبة