➡️ પહેલા ચાસણી બનાવીશું. એક મિડિયમ ઊંડા વાસણમાં કે તપેલીમાં ખાંડ અને પાણી લઇ ગરમ મૂકવું. ખાંડ ઓગળે અને એકાદ બે ઉભરા આવે એટલે ચેક કરવું. એક નાનો તૂટતો તાર બનતો હોય તો ચાસણી તૈયાર સમજવી. ગેસ પર 5-7 મિનિટ સમય લાગશે. પાણી માપનું લીધું હોવાથી ચાસણી જલ્દીથી બની જશે.ગેસ બંધ કરી તેમાં રેડ કલર અને રોઝ એસેન્સ ઉમેરવું.

➡️તરત ખીરું બનાવીશું. ચાસણી ઠંડી નથી પડવા દેવાની. એક બાઉલમાં મેંદો ચાળીને લેવો.તેમાં ઇનો અને ઘી ઉમેરી મિક્સ કરી લેવું.

પછી તેમાં થોડું થોડું પાણી ઉમેરી બરાબર મિક્સ કરવું. ઇનોના કારણે લોટમાં ઇન્સ્ટન્ટ રિએક્શન આવશે. લોટ જાળીદાર થઇ ઢીલો થશે. તૂટી તૂટીને ધીરે પડે તેવું ખીરું રાખવું.

ખીરું તૈયાર થાય એટલે તરત જ એક પાઇપીંગ બેગમાં ભરી લેવું. એક છીછરા પહોળા સપાટ તળિયા વાળા પેનમાં ઘી કે તેલ ગરમ મૂકવું. મેં અહીં 4-5 ચમચા સનફ્લાવર ઓઇલ અને 4-5 ચમચા ઘી મિક્સ લીધું છે.

ઘી પૂરું ગરમ થાય એટલે પાઇપીંગ બેગમાં નાનું કાણું કરી ઘીમાં જલ્દીથી બેગ ગોળાકાર ફેરવી જલેબી પાડવી. પાડતી વખતે ઘી પૂરું ગરમ હોવું જોઇએ નહીં તો જલેબી ફૂલશે નહીં અને ચપટી કડક થશે. પાડ્યા પછી ગેસ મિડિયમ કરી ગોલ્ડન બ્રાઉન કલર આવે અને એકદમ ક્રિસ્પી પડ થાય ત્યાં સુધી તળવી. કાઢીને સીધી ચાસણીમાં મૂકવી. ચાસણીમાં સરખી ડૂબાડવી.

તરત ગેસ ફાસ્ટ કરી બીજી વારની જલેબી તળવી. તે તળાવા આવે એટલે પહેલીવાર ની જલેબીને ચાસણીમાંથી સ્કૂયરથી કાઢી પ્લેટમાં મૂકવી. પછી નવી તળેલી ચાસણીમાં મૂકવી. લગભગ 2 મિનિટમાં એકવારની જલેબી તળાઇ જશે અને ચાસણીમાં રહેશે. આ રીતે બધી જલેબી બનાવી લેવી.

એકદમ ગરમ ને ક્રિસ્પી આ જલેબી બહુ જ મસ્ત લાગે છે. તેને મનગમતા ફરસાણ અને ચા, કે ઠંડી લચ્છેદાર રબડી સાથે સર્વ કરવી. આ રીતથી બહુ જ પરફેક્ટ એકદમ ક્રિસ્પી જલેબી બની છે.