ملاحظة في ما يخص مكونات : كي نقول "عبر" معناه القيس لي تعبري بيه كملي عبري بيه للاخير سواء كأس او غرفية مثال انا نعبر بغرفية نفقس البيض فيها حتى تتعمر تاخذ قيس 6 حبات بيض مثلا هنا بالنسبة للخمارة دايما فحلوة الطابع تكون الخمارة نصف البيض بمعنى كل زوج حبات بيض بوحدة خمارة هنا استخدمت 6 حبات بيض معناها نحط 3 خمارة

فالاول حطي البيض مع السكر وخلطي بالباتور او بيدك.السر نتاع الطابع باه مايجيش يابس هنا:
بحيث خلطي البيض والسكر حتى تحسي بالسكر ذاب مايبقاش حبيبات

ضيفي باقي المكونات حتى توصلي للفرينة ضيفي حسب الحاجة حتى تتحصلي على عجينة مش يابسة لازم تكون طرية وتكون تتلصق فاليد شوية

خليها تريح اربع دقائق واخدميها رشي سطح العمل بالمايزينة وفتحي العجينة بالحلال ورشيها من فوق بالمايزينة كذلك (نرشو سطح العمل بالمايزينة من أجل العجينة ماتيبسش. كون نرشو الفرينة رح تيبس بلخف) مايكونش السمك رقيق خليه خشين قيس 2 سم

اطبعي بليمول لي عندك تاع طابع مربع مستطيل دائري وردة هلال انا نفضل الوردة ودائري
حطي حبات فوق سنيوة فيها ورق الطهي او رشيها بالفرينة

اطلي الحبات بصفار البيض مخلط بشوية حليب وزيني بحلوة الملونة او رشة سكر عادي ودخليها الفرن تكوني شعلتيه مسبقا

طيبي حبات الطابع على نار هادئة مش قوية وعسيه حتى يحمار ويأخذ اللون الذهبي خرجيه

هاذي المرحلة الاخيرة مهمة 🤔 جيبي بوات مونجي كبيرة خاصة بالحلويات عندها الغلاق تاعها باش تغلقها فرشي طرشون وحطي حبات سخونين خليهم يبردو قيس عشر دقائق وغلقي باطة.هكا راح تحافظي على الطابع تاعك وماييبسش مع الايام.

ان شاء الله تكون طريقة واضحة واستفدتو منها شهية طيبة وشكرا 😍