نضع ماء في حله على النار ونضع عليها رشة ملح وعند الغليان نضع المعكرونة حتى تمام النضج ،تصفى المعكرونة وتقلب مع ملعقة من الزيت ونتركها جانبا

في طاسة على النار نضع ملعقتين من الزيت والبصل ونشوح البصل شوية حوالي دقيقتين بعد كده نضيف الثوم المفروم مع التقليب اول ما تبدا ريحتهم تطلع نضيف اللحمة المفرومة ومعاها الفلفل والزعتر ونسيبها على نار متوسطة ونقفل عليها لحد ما تستوي وبعد كده نضيف الملح

في حله على النار نضع الزبدة واما تذوب نضيف عليها الدقيق ونستمر في التقليب حتى يمتزجوا معا بعد كده نضيف اللبن مع استمرار التقليب ونضع الجبنة الكريمي والقشطة والجبنة النستو مع بعض ونقلب بالمضرب السلك حتى الذوبان وبعد كده نحط الملح والفلفل والزعتر

لو حسيتى ان البشاميل تقيل هتزودى لبن لحد ما توصلى للقوام اللي انتى عايزاه اما لو خفيف فهتجيبى بولة وتحطى فيها ملعقة او معلقتين دقيق وتحطى عليهم لبن وتقلبيهم على البارد الاول بعد كده تضيفيهم على البشاميل

نجيب بقى طبق كبير نحط فيه كل المعكرونة اللي سلقناها وعليها مغرفة من البشاميل ونقلبهم

نجيب الصينية ونحط نص كمية المعكرونة فيها وفوقها نحط اللحم المفروم ومتجيبيش اللحمة المفرومة على الحروف وزعيها في النص لكن متوصليش للحروف
ونحط باقي كمية المعكرونة والخطوة قبل الاخيرة نضيف البشاميل وعلى الوجه نحط الموتزاريلا

ندخلها على فرن ساخن على درجة حرارة ٢٠٠ واول ما الحروف تأخذ لون والجبنة تذوب نشغل الشوايه لحد ما يبقى الوجه لونه ذهبي غامق كده نخرجها من الفرن وبالهنا والشفا