باسم الله والصلاة والسلام على رسول الله 🌹 أولا نحضر المكسرات لي نكونو نضفناهم وخليناهم في الشمس قليلا حتى تتناحالهم الرطوبة ثم نرحيهم متوسطين أنا استعملت نصف كمية جوز و الباقي لوز ،نتركهم جانبا ، نبل العجين مسبقاً بساعات شخصيا بليتها في الصباح باكرا وخدمتها في المساء في جفنة نحط كيلات الفرينة داتلي 1 كيلو فرينة غير 2ملعقة.ك. وهادو الأخرين استبدلتهم بالنشاء يعني نقصت 2ملاعق فرينة و زدهم 2نشاء الذرة نضيف كمية الدهان استعملت السمن النباتي (المرجان)ذائب و بارد نبسس مليح بين أيادينا ثم نضيف البيضة

لي نخلطها قبل ما نضيفها مع الملح ونصب عليهم خليط الماء الورد والماء العادي ونبل ونعجن بدون ما نقطع العجين يعني ندخل مليح العجين في بعضو مالازمش تكون يابسة ولا طرية خلاص حتى نقدرو نتحكمو فيها نقسمها إلى 8 كرات ونغطيها ونخليها ترتاح مدة طويلة (إذا كان الجو ساخن نحطها في الثلاجة) ، أنا استعملت صينية مربعة (34/30) ترفد تقريباً كيلو مكسرات علو مليح لي تحبها عالية أكثر تزود حفنة زايدة أو تستعمل صينية أقل بقليل ،نبدا نطرح العجين بالكرة (استعملت الآلة) نسطح العجين قليلا بالحلال ثم نقسمها على نصف

مع الاستعانة بالنشاء ذرة ثم نمرر نصف الكرية في آلة العجين في رقم واحد ثم في رقم 5 ثم في رقم 9(أو الرقم الأخير في آلتكم بالإستعانة بالنشاء طبعا)ثم ندهن الصينية جيدا بالدهان ونحط شريط العجين نبدا بالجانب ونسويها مليح بلا ما نمزقها وهكذا حتى نكمل الطبقات بين كل واحدة ندهن مليح بالسمن (لا تبخلو 😊) لكن الرابعة لا ندهن سطحها لأننا نحط فوقها الحشو) لي نبلوه مع السكر قليلا بماء الورد والزبدة الذائبة لازم يتبل شوية لا ناشف ولا مبتل مثل الكسكس المبلل ونسويه جيدا ثم نزيد نكمل باقي الطبقات مثل الأولى ،

دون نسي دهنها ،حتى نصل إلى الطبقة الثامنة ثم نقطعها كيما تحبو بسكين حاد في الأول نعملو الحدود ثم نقطع جيدا حتى قاع الصينية، ونزينها بأوراق العجين ونرشقها بحبات اللوز ،صدقوني كنت نهاب نخدمها هادي المرة جاتني ولا أروع 👍 والسر الكبير أنو الحشوة لما نزيدلها الزبدة تجي متماسكة ، ندخلها الفرن سخن جيدا ثم نقص على 140يعني جد متوسط لمدة تقريباً ساعة حسب الفرن لما تشوفي الحواف بدات تحمر و رائحتها تفحفح طفي من التحت وشعلي من الفوق مدة 4دقائق ثم اسقيها بالعسل مباشرة وقطعيها بعد 6ساعات على الأقل وشهية طيبة