في إناء نحط الفرينة مع السكر والخميرة والملح وملعقة صغيرة زعيترة وملعقة صغيرة ثوم بودرة نخلط مليح النواشف من بعد نضيف ربع كوب زيت ونلم بالحليب الدافئ نحط العجينة على جنب نغطيها ونخليها تختمر لمدة عشر دقائق فقط

بالنسبة للحشو نحط القليل من الزيت في مقلاة ونحط مربعات الدجاج نضيفلهم البصل والثوم والملح والتوابل والهريسة ونضيف الجزر والفلفل ونخليهم يتقلو مليح حتى يطيبو نحيهم (نبعدهم) ونخليهم يبردو مليح

من بعد نجيب العجينة نتاعي مانحتاجش أني نخليها تختمر مليح نحتاج فقط أنها ترتاح شوية نقسمها إلى كريات نتوما تتحكمو في حجم الكرة نتاعكم نحط شوية فرينة في مكان العمل ونجيب بالكرية ونفتحها لاكن مالازمش تكون رقيقة بزاااف نحط مربعة من الجبن ونحط فوقها الحشو ونغلق العجينة نتاعي مليح بواسطة الأصابع فقط وندورها ونكمل هكذا حتى نخلص كامل الكمية لي عندي

في مقلاة نحط الزيت نحط كمية مليحة يعني لازم يكون الزيت غزير ونبدأ نقلي الحبات نتاعي بحبة وكي نحط كل حبة فوق النار نرش عليها الزيت الساخن بالملعقة باش تتنفخلي كيما اي مثل السفنج بنفس الطريقة ونقدمهم وبصحتكم⁦❤️⁩🧡