نبداو اولا بالعجينة نمزج المكونات من بعد نلم بماء الزهر حتى نتحصل على عجينة متماسكة ندلكها شوية ونقسمها على 13 كويرة نغطيهم بكيس بلاستيكي ونخليهم يرتاحو على الاقل ساعتين ومن الاحسن ليلة كامل

نحضر الحشو نمزج السكر والكاوكاو ونشمخ بماء الزهر لازم منكثرش حتى يولي يتعجن ندير شوية ونبربش شغل نفتل في الطعام ونغطيه بكيس بلاستيكي

نبدأ نفتح العجينة نفتح الكويرة الاولى بالحلال ونرش عليها المايزينة ونفتح الثانية نحطها فوقها ونرش المايزينة ونفتح الثالثة الى غاية السادسة من بعد نفتحهم كامل مع بعض على حسب الصينية ونروليها على الحلال

نذوب السمن وندهن الصينية مليح من بعد نحط فيها العجينة ونعدلها من الجوانب تكون مرتفعة مع اطراف الصينية

نبسط الحشو يكون مستوي على طول الصينية بنفس السمك

نفتح العجينة الثانية بالنفس الطريقة الاولى الى غاية الطبقة الخامسة نستغني عن المايزينة نفتحها ونحطها ونفتح السادسة ونحطها بدون ما نرش المايزينة (الغرض من الاستغناء هو لتفادي انتزاع الطبقات العلوية)

نبسطها فوق الحشو ونعدلها مليح حتى للاطراف نلسقها معاهم ونقص الزوائد ثم نقطع البقلاوة بالشكل لي نحبو والحجم حسب الذوق

نفتح العجينة المتبقية رقيقة ونشكلها ونزين بيها

نذوب السمن ونسكبو عليها من فوق على السطح ونحاول اني نتاكد بلي كامل السطح مدهون مليح بالسمن وندخلها الفرن مسخن من قبل على نار هادية

راح تاخذلنا حوالي ساعة و نصف الى ساعتين راح نلاحظو بلي الحجم تقلص نعرفو بلي طابت من الاسفل وبالنسبة لدرجة الاحمرار نفسها لي تظهر في الجوانب

نطفي عليها من الاسفل ونشعل عليها من فوق نعطيها تحميرة لي نحبها ونخرجها

بعدما تبرد نغطيها بكيس بلاستيكي ونخليها تبات ليلة كاملة وغدوة من ذاك نقطعها ونزينها حسب الذوق

ملاحظة اذا كنتو رح تزينوها بقوقعة {صدفة} او وردة او اي شكل من العجين اقسمو العجينة على 13 اما اذا كنتو رح تزينوها بمكسرات فقط اقسموها على 12

نتمنى انها تنال اعجابكم الوصفة وتجربوها وتنجحو فيها حبوباتي 😉😘 وانشاء لله نكون مبخلتش عليكم بحتى معلومة ولي عندها اي استفسار مرحبا بيها 😉😚😌