عجينة ال 10 دقايق و اسرع مخبوزات
طبعا كلنا عايشين زمن الاستعجال
عايزين نعمل 100 حاجة ووقتنا ساعات مش بيكفى
و الشتا بقا عايز مخبوزات تتاكل سخنة اومال الواحد هايحقق النظرية العلمية اللى بتقول اننا بنتخن فى الشتا ازاى ؟ :D يللا بينا
عجينة ال 10 دقايق و اسرع مخبوزات
طبعا كلنا عايشين زمن الاستعجال
عايزين نعمل 100 حاجة ووقتنا ساعات مش بيكفى
و الشتا بقا عايز مخبوزات تتاكل سخنة اومال الواحد هايحقق النظرية العلمية اللى بتقول اننا بنتخن فى الشتا ازاى ؟ :D يللا بينا
إفتح في تطبيق كوكبادالخطوات
- 1
اول حاجة علشان عجينة ال 10 دقايق تبقى ناجحة اننا بنعملها على مرحلتين.. اولا نحط الخميرة مع السكر و رشة الملح و المية و الخل و تلت << كمية الدقيق و نقلب حلو بشوكة لحد مايتكون عندنا عجينة سائلة لكن مفيهاش كلاكيع
- 2
غطيها بنايلون و حطيها فوق فرن ساخن عشان الجو برد و عايزين ننشط الخميرة او فى مكان دافيء زى كل الناس مابيقولوا و ذلك يا ستى لمدة 10 دقايق
- 3
بعد ال 10 دقايق علامة النجاح ان العجينة تكون خمرت.. بعد كده ندخل عالمرحلة التانية.. حطى الزيت و باقى الدقيق و لمى العجينة بحيث انها تاخد كل فتافيت الدقيق اللى فى الوعاء اللى حطاها فيه
- 4
بعد كده على رخامة مرشوشة دقيق اعجينها لمدة 10 دقايق و شغلى اى حاجة عاليوتيوب تسلى نفسك بيها اثناء العجن ولو لسة بتلزق جامد ادى رشة خفيفة تانى دقيق بس لو بتلزق خفيف مع العجن هايروح التلزيق او بردو اديها تلميعة زيت هتساعد ان التلزيق يروح
- 5
بعد العجن نبدأ التشكيل.. اول حاجة بس ادهنى العجينة بالزيت و ابدأى قطعيها حتت صغيرة
- 6
شكلى بقا زى مانتى عايزة.. كايزر فينو بيتزا حتى عارفة ممكن تعملى ايه؟ مخبوزات بالعجوة زى بتاعة الفرن ام صوابع دى.. او حضرى حشوة فراخ بالفلفل الالوان و بشر جبنه رومى و زتون متقطع و موتزاريللا و احشيها بس دى بالذات اعمليلها فتحات بالسكينة من برة علشان ماتنفش معاكى
- 7
اول حاجة للفينو بططى العجينة على شكل مستطيل او دايرة كبيرة شوية عشان تعرفى تحشيه و جيبي طرفه على 3 ارباع العجينة و دوسي و بعدين ضمى الطرف التانى و اقرصي الخط اللى هايتكون ده كويس عشان الفينو مايتفتحش اثناء السوا و ابرميه شوية و ظبطى شكله و حطيه على صاج او صينية مدهونه زيت بحيث تكون الحتة اللى قفلناه منها لتحت مش لفوق
- 8
بالنسبة للكايزر اعملى كورة و بططيها و لمى كل اطرافها و خليها شبه البؤجة :d يعنى كإنك هاتعمليلها ديل حصان لو افترضنا ان اطرافها دى شعرها :d وروحى لفة النهاية دى ودوسي عليها بالراحه بحيث تدفنيها جوة العجينة و تدويرتين عالرخامه و بردو حطيها عالصاج و بططيها خفيف بإيدك وخلى طبعا الناحية اللى مطرح اللف دى هى اللى تحت
- 9
بالنسبة لكحك العجوة ابو صوابع اعملى مستطيل طويل رفيع و حطى بطوله حتة عجوة مبرومة و طويلة و اقفلى العجينة عليها و ابرمى مرتين تلاتة كده لحد العجوة ماتختفى و العجينة تتقفل كويس وبعدين اقفليها زى الغويشة دايرة مقفولة و بالسكينة افضلى قطعى على مدار الدايرة بس مش كلها كلها يعنى.. سيبي حتة من الدايرة من غير تقطيع لحد ماتبقى شبه الوردة وبردو حطيها عالصاج
- 10
قبل التسوية خلى الفينو والكايزر ينفشوا للضعف وده هياخد معاكى حوالى تلت ساعه ف مكان دافى و مش لازم تغطية.. و بتاعة العجوة بلاش تنفش للضعف بس تحسي انها ريحت معاكى و حجمها زاد شوية خلاص كده و بتاعة حشوة الفراخ مش لازم تسيبيها تنفش.. اصل النفش يعنى لبابة من الاخر فشوفى ايه تحبيه فيه لبابة كتير و سيبيه ينفش للضعف
- 11
اخر خطوة.. التسوية.. التسوية ليها تكة مهمة اوى ركزى معايا.. هانسوى على حرارة 225.. الاول يكون الفرن سخن و شغالة فرن بس من غير شواية و حطى الحاجة على الرف اللى تحت خالص.. اهم نقطة عشان تطلع النتيجة هشة ان قعر المخبوزات لونه مايزيدش عن الاصفر الباهت الخفيف.. يعنى بس يتحول من الابيض للأصفر او الدهبى الخفيييييييف.. فمثلا 5 دقايق كده و تابعى بشوكة كده ارفعى الحاجة و شوفى قعرها.. وصلنا للون ده اطفى الفرن.. شغلى الشواية.. ارفعى الحاجة للرف الاوسط و سيبيها تاخد اللون اللى انتى عايزاه
- 12
لو مستعجلة بقا يبقى تانى افضل نتيجة هاتيجي لما تحطى الحاجة عالرف الاوسط فرن و شواية سوا على نفس درجة الحرارة و تابعى لون الوش اول مايحمر خالاويص كدة 😎
- 13
الكلام ده كله بياخد دقايق.. طلعتى الحاجة بإيديكى المبلولة امسحى وشها بالمية عشان لونها يزهزه او بفرشة بردو بمية خفيف او بخة مية لو عندك ازازة ببخاخة
- 14
طبعا انا مخبوزاتى دى من غير سمسم عشان معنديش.. لو قبل التخمير الاخير دهنتى وشها زيت و رشيتي سمسم او حبة بركة عالرخامة و دحرجتى المخبوزات عليها عشان السمسم يثبت ابقى قابليني لو اتبقى فتفوتة بالذات وهى الحاجة طالعه سخنة من الفرن و طرية
- 15
يللا حاجاتك كلها متوفرة.. اكيد ريقك جرى 😃 اه وبالنسبة للحفظ احسن حاجة فى الفريزر و مايكروويف ساعة الاستخدام.. ولو عايزة تضاعفى الكمية كل حاجة سهلة المضاعفة عندك اهو.. و بس كده 🤗
الكوكسناب
Keywords
وصفات مشابهة
وصفات ننصحك بمشاهدتها
التعليقات