اولا نحتاج 2 جينواز وحدة ب 4 بيضات و حدة ب 6 بيضات كنت مديت طريقة الجينواز في وصفات سابقة
نقطع كل جينواز الى ثلاث طبقات

نبدأ فالمونتاج نركب كل جينواز وحدها وأكيد كل طبقة نشربها بالشاربات مضاف اليه نكهة الكراميل أو البخاليني وبين كل طبقة وطبقة أكيد نحط الحشو انا عملت قاناش مونتي شوكولا وضفت عليه شوية جوز مهوش و صلصة كراميل بوغ صالي و مرة ضفت فوغاج ذوق فراولة وهذا بالتناوب طبقة بطبقة لما نكمل نحطهم يباتو قالثلاجة ليلة كاملة

لغدوة محضر قناش التغليف باه نغلفهم ضروري قناش نغلفها بقناش التغليف حتى تكوم خدمة نقية ومتحوفة لما نغلف بعجينة السكر
القناش لي هو 800 غرام شوكولا سوداء مع 400 غ كريم فراش الخاصة بالحلويات تكون ساخنة جدا نذرلهم مع بعض ونخليهم يبردو شوية ونغلف بيهم الكيكتين بعدما نجبدهم مم الثلاجة باردين ونسوي التغليف جيدا (تقنية التغليف لازم نتعلموها ماشي سهلة) لما نخلص نحهم فالثلاجة يبردو ويتماسك التغليف بعدها نجبدهم ندهنهم بشوية فقط مرغرين قليل جدا جدا بالبانسو

نفرد عجينة السكر البيضاء بالاستعانة بالنشاء و نغلف الكيكتين بالطريقة المعروفة فالكيك ديزاين ثم نحط دعامات فالوسط للكيكة الكبيرة (عبارة عن لي باي لي نشربو بيهم العصير) ونحط فوقها الكيكة الصغيرة ثم نبدأ فالتزيين

ثورة فروزن نجيبها من عند بائع لوازم الحلويات لانها غدائية نحط الصورة فوق عجينة سكر مبسوطة رقيقة ونقط بالكتور الخاص بعجينة السكر ونلصق الصورة بالاستعانة بشوية ماء ندهن بالبانسو ثم نفرد العجينة الزرقاء ونعمر روبة فروزن ونرسها بقليل من الناكخي الفضي وبعدها نعمل حبات الثلج نطبعهم من عجينة السكر (طابع خاص بحبات الثلج)

و التزيين فالكيك ديزاين يبقى فن ولازمو طول البال وهاذي هي النتيجة النهائية