في وعاء، نحطوا البيض + قرصة ملح + فانيليا و السكر و نخلط بالضراب الكهربائي (و تقدروا تستغناو على الضراب الكهربائي و تمحي داك السكر غير بيدك، كيما درت انا ههه)، المهم كي تحسي داك السكر ذاب + الزيت و نخلطوا مليح + الفرينة و الخميرة الكيميائية و نتحصلوا على عجينة طرية.

نقسموا العجينة على اثنين باش مننغبنوش، و نحطوا كيس بلاستيكي فوق يطح العمل و نرشوا عليه شوية فرينة، نحطوا العجينة و نرشوا فوقها شوية فرينة و نحطوا كيس بلاستيكي و نحلوها، السمك يرجع ليكم، تقدروا تعرفوا السمك لي بغيتوه اذا درتوا صبعكم فوق العجينة كيما ف الصورة.

أطبعوا بالأشكال لي تحبوها، اذا بغيتوها تجيكم طالعة أطبعوا فوق الصاشية (حتى و متطبعوش فوق الصاشية راح تجيكم طالعة) تقدروا تستعملوا عدة أشكال

حطوا الحلوى تاعكم ف صينية مرشوشة بالفرينة ولا عليها ورق الطهي كملوا كمية العجين كامل،و اشعلوا الفور تاعكم درجة حرارة متوسطة.

في إناء، نحطوا حبة البيض + شوية خل (أو حليب أو قهوة لتفادي رائحة البيض) أطلوا القاطو تاعكم بالبيض و حطوا فوق كل حبة شوية سكر عادي (تقدري تحطوا جلجلان لي هو السمسم، نوادكوكو ولا فارميسال ملون الاختيار يعود ليكم)

دخلوا حلوتكم للفور و خلوها تطيب و التحميرة ترجع ليكم اذا تحبوها طايبة بزااااف كيما أنا ولا شوية

و قولولي نتوما تاني العجينة لي تبقا معاكم ديروها شكل حلزون ولا غير أنا؟

المرة الجاية نحطلكم الوصفة لي تعلمتها من عند ماما ان شاء الله و بالصحة و الهنا ان شاء الله 🧡💛