نبدأ بسم الله ونجيب ريسبسيون نحط فيه علبة يارورت طبيعي وبنفس العلبة نحط حليب دافئ وماء دافئ وزيت ونخلط مليح ثم نحط ما ك سكر وم ك خميرة الخبز ونخلط مليح ثم نضيف الفرينة مع ما ص ملح وم ص خميرة الحلوى ونخلط

نبقا نخلط ونضيف في الفرينة حتى نتحصل على عجينة تلتصق باليد نغطيها ونخليها تختمر ثم نحضر الحشو لي هو اختياري انا حطيت عوض تونة الطماطم دجاج طايب ومرحي ونخلط معاه زيتون اخضر مقطع رقيق وماييس وجبن طري وم ك كريمة سائلة ونخلط مليح

بعد مااختمرت العجينة نقسمها على 2الجزء الاول شكلو كرات صغار ونغطيهم بورق شفاف والجزء الاخر خبيتو في كيس بلاستيكي وحطيتي في الثلاجة للغد نحضر بيه ميني بيتزا ونرجع العجينة الاولى نرش سطح العمل بالفرينة ونحل الكرة الاولى مستطيلة ونحط ما ك من الحشو وندهن الاطراف بالماء ونغلق كيما اي مثل حبة البوراك

نلف الكرة تاعي كما في الصورة حتى نكمل باقي الكرات بنفس الطريقة ونحطها فوق ورق طهي في سينة الفرن ونسخن الفرن من قبل يسخن ونخلي المملحات تختمر

ندهن المملحات بالبيض مليح ونرش عليهم جبن مبشور وندخلهم الفرن يطيبو من تحت ثم نشعل عليهم من فوق يتحمرو ونخرجهم ونغطيهم بطرشونة لوقت التقديم

الشكل الاخير للمملحات تاعي جاو بزاف خفاف يتقدمو مع حريرة او حساء خضار وصحة فطورك وتقبل الله منا ومنكم