نبدا بسم الله ونجيب ريسبسيون نحط فيها الزبدة وكاس الا ربع سكر ناعم مع رشة ملح ونخلط مليح ثم نضيف بيضة كاملة وصفار بيضة ونخلط ثم 2م ك نشاء

نخلط مليح ونحط 2م ك جوز الهند ونواصل الخلط ونبدا نضيف فالفرينة تدريجيا حتى نلم العجينة

نجيب مول شكل مهراس ونبدا نعمر العجينة فالمول حتى نكمل كامل العجينة نثقبها ونشعل الفرن وندخلها تطيب ونخرجها ونخليها تبرد

نخرجها من المول ونجيب ملون ذهبي سائل وندهن بيانسو أطراف حبة المهراس قبل مانحشيها

بعد ذلك نحضر الحشو الاول نحط في كسرونة 150 غ شكولا بيضاء و150 غ توفيا كرميل و70 غ كريمة سائلة ونخلط ونحطها عالنار كي تغلي

نطفي النار ونضيف عليهم كاس جوز الهند ونخلط مليح ونخليه يبرد ثم نحطو طبقة اولى في حبات المهراس

بعد ذلك نجيب كريمة البندق المحمص ونحطها في كيس حلواني ونحطها كحشو ثاني فوق الحشو الاول

بنفس الطريقة لي حضرت بيها الحشو الاول نحضر كرات الرفايلو لكن نحط 2كاس جوز الهند ونخلط مليح حتى ترجع شكل عجينة ونجيب قليل من الزيت ونشكلها كرات صغيرة ثم نحشي كل كرة يحبة بندق ونعاود تغلقها من جديد ثم نذوب شكولا بيضاء على حمام مائي

نغلف كل حبة بالشكولا ونحطها فالنواد كوكو نرمدها مليح حتى نكمل كامل الكرات

نحط حبات الرفايلو فوق كل حبة مهراس حتى نكمل ونزينهم بأشكال عيد مبارك

فالاخير نحط ديليس الرفايلو فالكيسات