نبدأ بسم الله ونجيب ريسبسيون نحط 2ييض مع رشة ملح و5 ما ك سكر ونخلط مليح ثم نضيف 5م ك زيت ونواصل الخلط

نضيف بعد ذلك 5م ك حليب وم ص فانيلا ونخلط ثم نحط قدرة من عطر الفراولة ونخلط جيداً ثم نحط فالاول 5م ك فرينة وم قهوة صغيرة خميرة الحلوى ونخلط

ثم نضيف 2م ك فرينة يعني الكل 7 ما ك فرينة ونخلط جيداً

نجيب سارسو شكل قلب نغلفو بورق شفاف مليح ونحطو في سينة فرن ونحط فوق الصينية ورق طهي ونفرغ الخليط تاعي ونسويه مليح ونكون شعرت الفرن يسخن من قبل وندخل الجينواز تطيب اي تستوي ثم نحضر كريمة ديبلومات

نجيب كسرونة نحط فيها 2كاس حليب و4م ك سكر و3م ك نشاء ونخلط بارد في بارد ثم نحطها فوق النار

بعد ماثقالت نطفي النار ونفرغها في صحن

تغلقها بورق شفاف ملامس وندخلها المجمد ثم نرجع نخرج الكيك تاعي بعد ماطاب ونخليه يبرد وننزعو من السارسو

نخليه يبرد تماما ثم نغلفو بورق شفاف وندخلو الثلاجة انا خليتها ليلة كاملة وفي الغد نخرج الكيك ونقسمو الى 3اقسام

القسم السفلي لازم يكون أقل من سارسو القلب ونجيب علبة فراولة نغسلها مليح ونشفها

نحط الجزء الاول في أسفل السارسو ثم نقطع حبات الفراولة الى النصف ونرصهم عالسارسو كما الصورة ونضغط مليح عليهم نخليهم على جنب ونروح الكريمة بعد ماجمدت نخلطها بالخلاط الكهربائي حتى ترجع كريمة

ثم نجيب ريسبسيون اخرى نحط فيها كاس شانتيه وكاس حليب ونخلط مليح بعد تطلع معايا الشانتيه وتثقال ثم نضيف كمية الشانتيه عالكريمة ونخلط

راح نتحصل على كريمة ديبلومات طعمها هائلة وناعمة نجيب كيس حلواني ونعمر فيه الكريمة ونبدا بالحواف كامل ثم نرجع نعمر وسط الكيك ونجيب سباتيلا ونطلب الحواف

ثم نسوي الكريمة مليح ثم نجيب كمية من الفراولة نقطعها رقيقة ونحط عالسطح ثم نحط الطبقة الثانية ونكمل بنفس الطريقة حتى نلحق الطبقة الاخيرة نحطها من فوق وندخلها مليح في المول

نغطي سطح الكيكة بالكريمة ونسويها مليح ونحط فوق صحن دوار وندخلها المجمد مدة ساعة

نخرجها ونحطها على جنب ونرجع نحضر الطبقة الاخيرة في كسرونة نحط كاس ماء وكاس فراولة مقطعة وم ك سكر ونحطها على النار تغلي مدة 10 دقيقة ثم نطفي عليها النار

نضيفلها علبة فلان ذوق فراولة ونخلط مليح ونجيب برا ميكسار ونرحيها مليح ثم نطلع السارسو قليلا ونفرغ الخليط على سطح الكيكة وندخلها الثلاجة يتماسك

فالاخير نزينها بانصاف حبات الفراولة