نبدأ بسم الله ونجيب طنجرة نحط فيها فخذ دجاج ثم نحط حبة بصل مرحية فالاشوار مع 2سنات ثوم ونحط معدنوس مقطع وملح وفلفل اسود وم ص كركم وم ص زنجبيل وم ك زيت ونحطها على النار تتقلى مليح ثم نضيف كمية من زيتون اخضر ونقلي الكل مليح

نمرق بالماء ونخلي الدجاج والزيتون يطيب. مليح ثم نرجع نحط في صحن نصف صدر دجاج مرحي نضيفلو معدنوس مقطع وفلفل اسود وتابل دجاج ثم نجيب مقلاة نحط فيها ما ك زيت ونضيف كمية البصل المتبقية نقليها

نضيف الدجاج المرحي على البصل ونقلي مليح حتى يتحل مليح ونضيفلو حوالى 2م ك ماء ونخليه يطيب مليح

نفرغ الدجاج بعد ماطاب ونرحيه فالاشوار ثم نفرغ ونحطو في صحن واسع نضيف عليه 3حبات بيض ونصف كاس كريمة سائلة ونخلط مليح

ثم نضيفلو حوالى 3م ك جبن طري ونخلط مليح ثم نجيب المول الاسطوري نحط فيه ورق الطهي ونفرغ الخليط تاعي ونسويه على كامل المول ونشعل الفرن يسخن

نجيب حبة بطاطا نقشرها ونغسلها مليح ثم نقطعها غالشكل الموضح في الصورة ثم نجيب مقلاة نحط فيها كمية من الزيت ونقلي البطاطا ونحمر كذلك فخذ الدجاج ونخلي المرق تاعي ينشف ويثقال

بعد ماسخن الفرن دخل طاجين الجبن يطيب حتى مليح حتى ينشف من تحت ثم نشعل من فوق ونخليه يتحمر ونخرجو من الفرن ونجيب جبن شرائح ونقص قطع رقيقة ونغطي كامل السطح ونرجعو الفرن نشعلو من فوق فقط ونخلي الجبن يتحمر مليح ثم نخرجو ونخليه يبرد

فالاخير نجيب صحن التقديم ونقطع طاجين الجبن الى مربعات ونحطو فالصحن ونحط البطاطا المقلية وكذلك فخذ الدجاج المحمر ثم نفرغ كمية. المرق والزيتون في الوسط ونزينو بفلفل حار ومعدنوس مقطع جاء بزاف بنين