نبدا بسم الله ونجيب ريسبسيون نحط فيها 2حبات بيض مع رشة ملح و م م فانيلا وكاس ناقص إصبع سكر

نبدا نحفف مليح حتى يصبح الخليط ابيض ثم نضيف كاس ناقص إصبع زيت ونواصل الخفق مليح

نضيف بعد ذلك كاس ناقص إصبع حليب دافئ ونخلط مليح ثم نبدا باضافة 2كاس فرينة مغربلة مع 2كيس خميرة الحلوى ونخلط مليح

نتحصل على خليط نضيفلو م ص عطر الفراولة

نقسم الخليط تاعي الى 3اقسام متساوية ونجيب سينية فرن طول 30/25ونحطلو ورق طهي ونفرغ الكمية الاولى ونسويها مليح ثم نشعل الفرن مسبقا على نار عالية ثم ندخل السينية الاولى ونقص النار ونحطها تطيب مدة 10 د

الوقت لي هيا تطيب نجيب ريسبسيون نحط فيها كاس شانتي وكاس حليب ونخلطها مليح بالخلاط الكهربائي حتى تطلع مليح ونرجع نجيب كسرونة نحط فيها كاس ماء ونصف كاس سكر ونخلطو مع شريحة ليمون ونحطو يغلي عالنار مدة 10د ونطفي عليه النار ونضيفلو عطر الفراولة

بعد ماطابت الطبقة الاولى نخرجها ونحطها على طرشونة ونقلبها فيها مباشرة

نغطي الطبقة الاولى بطرشونة ونطيب 2 طبقات بنفس الطريقة ونغطيهم بطرشونة

نجيب صحن دوار ونحط سات دوتارت فوق الصحن ونحط الطبقة الاولى ونشربها مليح بالسيرو ثم نحط كمية من الشانتي نسميها مليح ثم نحط حبات مقطعة من الكرز

ونحط خطوط من شكولا الطلي ثم نحط الطبقة الثانية ونشربها مليح ونحط كمية اخرى من شانتي ونحط قطع كرز وخطوط. شكولا ونحط الطبقة الاخيرة ونقطع الحواف الاربعة

بعد ذلك نغطي سطح الكيكة بالشانتي كاملة ونسزيها مليح والجوانب كذلك بالسباتيلا ثم باقي الكريمة نحطلها عطر الفراولة ونجيب كيس حلواني ولدوي ونشكل وردات فالجهات الاربعة ثم نجيب شكولا الطلي نحطها في كيس حلواني ونكتب عيد ميلاد سعيد ونزينها بحبات من الكرز

فالاخير شكل تارت عيد ميلادي كان يوم أمس ذوق الكرز

شكل التورتة تاعي بعد ماقسمتها وقدمتها مع قهوة العصر او مع عصير