نبدأ بسم الله ونجيب كوسا وحبات بطاطا نقشرهم ونغسلهم مليح ثم نقطعهم مربعات صغيرة والفلفل كذلك

كان عندي قطع دجاج طايب صدر فتتو كاضافة فقط نقدرو نستغناو عليه ونجيب مقلاة نحط فيها زيت ونخليه يسخن ونقلي البطاطا فالاول ثم الكوسا والفلفل مع بعض

نجيب حبات الطماطم نرحيهم فالاشوار وفي نفس المقلاة نقص كمية الزيت ونحط الطماطم نضيف عليها ما ك طماطم مصبرة وملح وعكري حلو وفلفل اسود وراس الحانوت و2سنات ثوم مرحيين ونقليها مليح ثم نضيف كاس ماء ونخلي الصلصة تطيب اي تستوي مليح ثم نجيب كمية من الزيتون الاخضر نقطعو دوائر

بعد ذلك نجيب رسبسيون نحط فيه الدجاج المفتت والبطاطا والكوسا والفلفل ونحط عليهم قطعة جبن طري وحبة بيض ونجيب علبة ياغورت طبيعي عوض كريمة سائلة ونضيفلها نصف كاس حليب ونخلط الكل مع بعض ثم نجيب مول يدخل الفرن ونحط الكمية الاكبر من الصلصة من الأسفل وبقية الصلصة نخلطها مع الخضار ونفرغ مباشرة خليط الخضار فوق الصلصة ونسويه مليح ونحط كمية من جبن مبشور ثم نجيب ورق طهي نشمخو في الماء ونغطي المول ثم نحط ورق المنيوم من فوق نشعل الفرن يسخن وندخل الڨراتام تاعي يتحمر

فالاخير نخرج الڨراتان تاعي بعد ما ذاب الجبن المبشور وخليتو يتحمر ونخليه يبرد

فالاخير شكل الڨراتان تاعي ساهل ووصفة صيفية