نبدا بسم الله ونجيب رسبسيون نحط فيه كاس حليب دافئ وكاس ماء دافئ نضيف عليهم 5م ك سكر وم ك خميرة الخبز ونخلط مليح ثم نضيف رياضة حبة بيض ونصف كاس زيت او نصف كاس زبدة ذايبة وباردة ونخلط مليح

نبدا باضافة الفرينة تدريجيا بالكاس ونلم ونحط م ص ملح ونخلط ونبقا نضيف فالفرينة

نلم العجينة تاعي انا اخذت معي 5كاس طحين ونصف وكل واحد ونوع الفرينة تاعو نغطيها بورق شفاف ونخليها تختمر حوالي 25د وبعد ماطلعت نحي الورق الشفاف ونهبطلها الخمور

نرش طاولة العمل بالفرينة ونحط العجينة ونعجنها حوالي 10د حتى تصبح ملساء

بعد مالميتها مليح نعاود نرش سطح العمل بالطحين ونحل العجينة تاعي على شكل مستطيل

نجيب 4م ك من شكولا الطلي ونطلي العجينة كاملة ثم نلف من أسفل ونطلع حتى نشكل حربوش ونلمو مليح ونغلق العجينة من تحت

بعد ذلك نجيب خيط ونقطع بيه دوائر كنا فالصورة حتى نكمل كامل الحربوش ونجيب سينية نحط فيها ورق الطبخ ونحط جميع الحبات انا خرجتلي 2سينيات نغطيهم بطرشونة ونخليهم يختمرو مرة أخرى

نجيب صغار البيضة ونضيفلها 2م ك حليب وندهن حبات البريوش بعد ما اختمرو مليح ويكون الفرن يسخن مسبقا ندخل السينية الاولى تطيب من تحت ثم نشعل لها تتحمر من فوق ونخرجهم

نفرغ البريوش من السينية ونحطو في سيينة واسعة ونخليه يبرد

فالاخير نقدر ندهن حبات البريوش بقليل من المعجون ونرش عليه سكر ناعم جاء بزاااف خفيف يقدم مع قهوة العصر او مع فطور الصباح والف صحة وعافية