نبدا بسم الله ونجيب كسرونة نحط فيها حبات البطاطا بعد ماقطعتها مربعات رقيقة ونضيف عليها الماء والملح ونحطها عالنار تطيب مليح ثم نصفيها ونحطها في صحن ونمعسها مليح بالشوكة حتى ترجع ناعمة ونضيف عليها م ك زبدة ومعدنوس مقطع و2سنات ثوم مبروشين ورشة فلفل اسود وندخل فيها الزبدة والمعدنوس مليح و نخليها على جنب

نرجع نجيب نصف صدر دجاج نقطعو مربعات نحطو في صحن ونضيف عليه التتبيلة نحط موطارد وملح وفلفل اسود وزنجبيل وعكري حلو وكركم وتوابل الشاورما وم ك خل وم ك زيت ونخلط مليح

نغطي اللحم بورق شفاف ونخليه حوالي ساعة وممكن اكثر وبعد مرور ساعة نجيب مقلاة ونحطها عالنار ونفرغ خليط اللحم ونخليه على نار متوسطة. نبقا نقلب حتى يطيب اللحم مليح

نرجع بعد ذلك نجيب مول زجاجي يدخل الفرن ندهنو بالزبدة ونشكل البطاطا الى كرات كما فالصورة ونشكل الكرات شكل العش كما فالصورة وبقية البطاطا شكلتها في مول زجاجي فردي

بعد ذلك نجيب جبن طري ونحط قطعة مليحة في كل عش بطاطا ثم نحط كمية من لحم الشاورما كما فالصورة

نجيب بعد ذلك صلصة طماطم كانت جاهزة عندي نحطها في مقلاة نخففها بقليل من الماء

نفرغ كمية الصلصة فوق اللحم ونجيب كمية من جبن مبشور نحطها في كل عش بطاطا ونشعل الفرن يسخن من فوق فقط ونغطي بورق طهي وندخلو يتحمر ويذوب الجبن فقط

بعد ماذاب الجبن وتحمر الطبق نخرجو من الفرن ونحطو ونخليه يبرد

فالاخير شكل قراتان الشاورما جاء بزاف بنين وخفيف احسن من البطاطا المقلية او شاورما بخبز الرغيف