نبدا بسم الله ونجيب طنجرة نحط فيها قطع دجاج ونضيف عليهم حبة بصل وسنات ثوم مرحيين ونضيف ملح وبقدونس مقطع رقيق وزنجبيل وكركم وملح وفلفل اسود و2م ك زيت ونجيب كسرونة واسعة نحط فيها راس شفلور صغير بعد ماغسلتو مليح ونضيف عليه م ص ملح ونحطو عالنار يطيب ومن جهة آخر. نحط نقطع حبات زيتون اخضر شرائح

نحط الطنجرة عالنار ونقلي مليح ونضيف الزيتون ونواصل القلي جيدا ثم نجيب حبة بطاطا نقطعها الى مربعات

نقلي البطاطا تاعي فالمقلاة ثم نحطها في صحن ونرجع نصفي الشفلور بعد ماطاب في كسكاس ونجيب صحن نحط فيه حبة بيض كبيرة مع رشة ملح ونحط فيها ازهار الشفلور

نقلي زهرات الشفلور مليح ثم نحطها تقطر فالكسكاس وكي تبرد نحطها في رسبسيون واسعة ونقطعها بالسكين او ملعقة كما فالصورة

نرجع لقطع الدجاج نخرجهم من المرق ونحطهم يبرد. على لوح تقطيع ثم نفتتهم مليح ونرجع نحط البطاطا المقلية عالشفلور ونضيف كزبرة مقطعة رقيقة ثم الدجاج المفتت

نرجع المرق بعد ماطاب نصفيه في كسكاس ونضيف البصل والزيتون على خليط الشفلور

نضيف بعد ذلك حبة بيض كبيرة وطنية مليحة من الجبن الطري ونخلط مليح ثم نجيب المول الاسطوري وندهنو بالزبدة مليح من الاحسن نفرشو بورق الطبخ ونفرغ الخليط فالمول ونسويه مليح ثم نجيب صحن نحط فيه حبة بيض ونصف كاس كريمة سائلة او حليب وكمية من الجبن ونمسكيها بالبرا ميكسار جيدا

نفرغ خليط الجبن والبيض من فوق ونحط كمية مليحة من الجبن المبشور وندخل القرتان الفرن بعد ماسخن من قبل نخليه ينشف تماما من أسفل ثم نشعل عليه من فوق حتى يتحمر ويذوب الجبن تماما ونخرجو ونخليه يبرد

نجيب سكين حاد ونقطعو الى مستطيلات ونجيب صحن التقديم نحط فيها 4حبات من الڨراتان

بعد ذلك نفرغ كمية من مرق الدجاج لي طيبتو واحتفظت بكمية عالجوانب ونزينو بفلفل حار واجنحة دجاج محمرة وشرائح ليمون وكزبرة مقطعة شكلو جاء بزاف راقي وجاء بنين في نفس الوقت