نبدأ على بركة الله، كيّلت كاس سعته 200 ملل برغل استعملت الخشن غسلتو عدة مرات باش نتخلص من النشا اللي فيه وخليتو يستقطر بجيه.

في مقلاة فرغت الزيت السمن وخليتهم يسخنو شوية ضفت عليهم البصل المقطع وخليتو يذبال شوية على نار متوسطة.

ضفت عليه الثوم مبشور وخلطت مليح ثم ضفت حبة جزر مبشورة في الرقيق وخلطت الكل جيدا.

ثم ضفت الطماطم نقيتها من القشرة وقطعتها قطع صغيرة ثم ضفت الطماطم المصبرة وخلطت كل المكونات حتى اندمجت مع بعض.

ثم ضفت التوابل (الملح، الكركم، الفلفل الأسود، راس الحانوت، الفلفلة حمرة والكمون) خلطت الكل جيدا.

ثم ضفت مكعب المرق (يمكن الإستغناء عليه) وفي الأخير ضفت البرغل قليتو مليح حوالي دقيقة.

ومرقت بنفس الكاس اللي كيلت بيه البرغل الماء يكون دافي (لكل كوب من البرغل يقابله كوبين من الماء) خليتو شد الغلية حسبت مدة 5 دقائق بعد الغليان نقصت عليه أقل من المتوسط وخليتو يطيب على خاطرو.

فاتت 20 دقيقة حليت عليه صبت شرب كامل الماء رشيت عليه رشة خفيفة من النعناع اليابس (زادلو في البنة) خلطت تخليطة خفيفة وغلقت على المقلاة وطفيت النار وخليتو مدة 10 دقائق.

جا بزاف بنين😋 وحبات البرغل جاو مفروزين👌🏻، شهية طيبة للجميع 🥰

وقدّمتو مع الدجاج مشوي وبألف صحة وهنا 👌🏻😋👌🏻