نبدأ بسم الله ونجيب رسبسيون (وعاء) نحط فيه نصف صدر دجاج نضيف عليه علبة زبادي وتوابل شاورما وملح فلفل اسود وبابريكا حلوة وحارة اختياري ونخلط جيداً ثم نضيف ملعقة كبيرة موطارد (خردل) وم ك زيت نخلط ونغطيها بورق شفاف ونخليها حوالى 2 ساعة

نرجع نحضر العجينة في رسبسيون نحط علبة زبادي بدرجة حرارة المطبخ وبنفس العلبة معمر حليب دافئ ونخلط ثم نضيف ملعقة كبيرة سكر و ملعقة كبيرة خميرة الخبز

نخلط جيداً ثم نضيف علبة الا ربع زيت وبياض بيضة نخلط جيداً ونضيف فالاول كاس فرينة وم ص ملح

نبقا نضيف في الفرينة ونلم حتى نتحصل على عجينة طرية نوعا ما نغطيها ونخليها تختمر بعد ما اختمرت نرش سطح العمل بالفرينة ونحل العجينة مستطيل

نقص العجينة مثلثات كما في الصورة بالسكين ونجيب مول يدخل الفرن يكون القاعدة تاعو تنفصل عن الجوانب ندهنو بالزبدة ونرشو بالفرينة ونشكل حبات كرواسون ونغطيهم ونخليهم يختمرو حتى يتضاعف الحجم تاعهم

بعد ما اختمرو جيداً ندهنهم بصفار بيضة مع قليل من الحليب ونرش عليهم سينوج (حبة البركة) ونشعل الفرن يسخن وندخل خبزة الكرواصون تطيب اي تستوي ونرجع لطهي حشو الشاورما نجيب مقلاة نحط فيها ما ك زيت نحطها على النار ونفرغ الخليط في المقلاة ونطهيها جيداً

بعد ماطاب لحم الشاورما نطفي عليه النار لحين التقديم ونخرج خبزة الكرواصون من المول وننزع الجوانب كما موضح في الصورة

نجيب صحن التقديم نحط فيه خبزة الكرواصون ثم نفرغ الشاورما من فوق كما في الصورة ونزينها بمعدنوس مقطع ومايونيز وحبات زيتون اسود

فالاخير شكل الطبق تاعي قدمتو على طاولة الافطار البارح مع شربة فريك