هنا ضربتهم اهو وبيكونو نفس الشكل ده, بس هنا انا عامله 3 أضعاف الكميه و عملولي 9 حبات كريب.

هنجيب بقى طاسه كبيره عندك, انا معنديش طاسه كبيره فاستعملت صينيه كبيره.

حضري طبق فيه شويه زيت صغيرين خالص.

إدهني بقى الصينيه زيت, بس اوعي يبقي كتير يعني يا دوب تبقي طبقه خفيفه من الزيت زي الصورة كده.

بختبر بقى سخونه الطاسه ودي اهم خطوه. لازم تكون دافيه يعني ولا سخنه ولا بارده, اختبريها بايدك كده.

بصي بقى هتعملي ايه, هتنزلي بكميه معقوله من العجينه في الطاسه.

و بسرعه امسكي الطاسه و لفيها دوران, بحيث ان العجينه تتوزع على حجم الطاسه, زي مانا عامله في الصورة كده.

بعدين تسيبيها على نار هاديه او متوسطه و سيبيها لحد ما تلاقي طروف العجينه انفصلت عن الطاسه, زي ما باين في الصورة كده.

امسكي بقى الطاسه و افضلي هزي فيها لحد ما تلاقي العجينه كلها اتحركت و فكت من الطاسه. لو لقتيها متحركتش كلها معاكي او اتحرك جزء وجزء لا يبقي سيبيها شويه كمان على النار لحد ما تتحرك كلها معاكي وانت بتهزيها.

امسكي بقى طرفها بايدك و حاولي تقلبيها على الوش التاني ممكن تقلبيها بمغرفه كبيره او زي ما تحبي, بس انا بتحكم بايدي اكتر عشان المغرفه بتقطعلي العجينه.

شايفه وشها محمر ازاي بعد ما قلبتها.

بسيبها شويه بردو عشان الوش التاني يحمر. و ده لما اتحمر كده خلاص من الوشين.

العجينه بتفرديها قدامك و تحطي حشوك في النص الفوقاني, يمين وشمال وتسيبي مسافه في النص. انا هنا حشيتها شيش طاووق و لانشون و زيتون و جبنه رومي مبشورة وكاتشب ومايونيز.

وبعدين بتقفلي العجينه نصين بالشكل ده.

و بعدين تقفلي النص ده على بعضه كده.

و بيقي مثلث بالشكل ده.

طبعا بعد كل ده, بعد الحشو و كله, بترجعيها تاني للطاسه. سخنيها من الوشين تاني على نار هاديه وهو مثلث عشان يكمل سوا العجينه و يمسك نفسه والجبنه تسيح ويدي لون و مايبقاش طري. انا هنا حاطه اربعه مع بعض.

وبالف هنا و شفا.

يجنن. 😍