منجهز حشوة اليبرق, منكون ناقعين الرز وغاسلينو ومصفينو. منضيف فوقو اللحمة الناعمة والملح والفلفل وملح الليمون ومنتبلن منيح. واذا اللحمة مو مدهنة كتير, فينا نضيف ملعقة سمنة.

منلف ورق العنب, منحط لكل ورقة ملعقة صغيرة من الحشوة. ومنسكرا ومنلفا بالطريقة المعتادة.

بعد مانخلص لف, منجمع كل عشر حبات تقريباً بكف اليد ومنربطن بالخيطان حتى مايفلتو. أو فيكم تصفوهن بالطنجرة بدون ماتعملوهن حزمات.

منصف شرحات اللحمة, أو اذا مو متوفر منحط أفخاذ دجاج. طبعاً منضفين ومغسولين ومنحط عليهن ماء ومنخليهم على النار ليغلو.

منشيل الزفرة, عنهم بعدين منصفي المرقة على جنب ومنبلش نصف اليبرق بالطنجرة. وبيناتن منحط شرحات اللية. وبالأخير منصف روس الثوم.

منكبسن بشي تقيل حتى مايفوشو لفوق ومنحطن على النار لحتى يبلشو يغلو. ومنهدي تحتن ومنتركن ساعتين أو تلاتة حسب نوع الورق. واذا كنتو عمتطبخو بطنجرة الضغط أو البخار, مابيحتاج تقريباً ساعة بس ومنطفي عليه.

منذوب بالمرقة يلي صفيناها عن اللحمة بملح وشوية ملح ليمون. ومنسكبهم فوق اليبرق.

منقلب اليبرق ومنفكو من الخيطان ومنترتبو ومنقدمو ساخن. وبالهنا والعافية يارب.