اول حاجه سمي الله كدة و هيأي نفسك لفول يظبط مزاجك مع كوباية شاي بالنعناع ان شاء الله و هاتي حلة او اى حاجه بتدمسي فيها الفول و حطي الفول سواء كنتى ناقعاه طول الليل في مية او لأ

غطيه كويس جدا بالمية و حطي الرز و العدس.. الخطوة دى شوفتها عند البنت بتاعة صفحة مطبخ تيك تاك عاليوتيوب و قلت اجرب كدة و فعلا حلوة جدا

حطى الطماطم و الكركم و الصلصة و عادى لو عايزة تحطي بصلايةبس انا لما محطتش محصلش اى حاجه

و غطى السطح بالزيت كمية حلوة تحسي انها غطت الوش.. الخطوة دى بتمنع ان الفول يسود

حطي الفول على نار هادية و ممكن بردو تسويه في الفرن ايوة في الفرن، حطي طبقة فويل قبل ما تحطي الغطا علشان تتأكدى ان الحرارة محوطة الفول علشان يستوى حلو و حطى الغطا كويس و حطيه لو في الفرن على حرارة ١٨٠ درجة في الرف الاوسط او طبعا على البوتجاز و سيبيه يعيش.. بيعيش كتير على فكرة اقله 4 ساعات.. اقله.. كل ساعتين كدة اطمنى عليه انه مش محتاج مية و اديه تقليبتين كدة و سيبيه و عادى لو استوى وانتى روحتى تشوفيه بعدها و عدى وقت بعد ماستوى خلاص.. بالعكس هايبقى طرى اكتر و نتيجه احلى

خلاص الفول خلص.. يللا على الخلاط بقا و اضربيه حلو جدا يبقى ناعم زبدة و قسميه على علب او سيبيه يبرد و حطيه في اكياس نايلون و حطي في الفريزر ماعدا الجزء اللى ها تستخدميه

نيجي للطبق بقا.. زى ماقلت في المقادير بالظبط.. ملح فلفل كمون كزبرة ناشفة زيت و طحينة و عصرة اللمون و قلبي بالشوكة ولا اجدعها بتاع عربية فول و دوقي علشان تظبطي مقاديرك حسب ذوقك و اول ما كله يتظبط معاكي هتلاقيكي وانتي في مكانك بتقمرى العيش ولا سفرة ولا يحزنون.. و عن تجربة 😄😄 و بالهنا و الشفا