كلنا بنعرف نعمل الكشرى بس فيه تكات هكتبهالك هتفرق معاكى جدا في الطعم النهائى

اولا هنجيب طاسة ونحمر البصل وده هنعمله اول حاجة علشان هنستعمل البصل والزيت مش بس في الزينة ولكن هم اصل الكشرى وتشيلى البصل وهو لونه افتح من اللون اللى بتحبيه

لعمل الرز هنجيب جزء من الزيت اللى قلينا فيه البصل ونحمر بصلة صغيرة يا دوب تدبل وتبقى شفافة ومش عاوزينها تلون وننزل عليها بالرز والعدس الاصفر

المكرونة هتحطيها في ماء بتغلى معاها ملح وسيبيها تغلى 5 دقايق وبعدين اطفى عليها النار وغطيها وسيبيها حوالى عشر دقايق وبعدين صفيها من الماء وما تخافيش مش هتعجن ابدا بالعكس هي هتكمل تسوية في الماء السخنة وهتستوى كويس جدا ودى طريقة بتوفر في الغاز وبعملها لما بسلق البيض وبيطلع مظبوط

دلوقتى هنسلق العدس بجبة ولو هتنقعيه يبقى مش اكتر من ساعة وتحطى له مقدار ماء زى كأنك بتعملى رز وما تكتريش ماء وملحيه وسيبيه يستوى واى ماء زيادة صفيه

الشعيرية هناخد برده من الزيت اللى قلينا فيه البصل ونحمر الشعيرية ونملحها ونسقيها بالمية ونسيبها تستوى وقبل ما تستوى تمام ارفعيها من النار وهى هتكمل التسوية برده

هتاخدى جزء من الزيت بتاع البصل وتجيبى ثوم وتشوحيه لحد ما يحمر وعليه رشة كمون ورشتين كزبرة وبعدين وزعيه على المكرونة والشعرية والعدس ابو جبة وقلبى وبكده الطعم هيعلى معاكى جدا

بالنسبة للصلصة برده هتجيبى من زيت البصل وتحمرى ثوم مع ملعقة سكر واول ما الثوم يبقى ذهبي ضيفى عليه الكزبرة الناشفة وشوية من البصل المتحمر وده سر الصلصة بعدين اطفيهم بشوية خل حوالى ربع كباية واول مايغلوا انزلى بالطماطم وفلفلة خضرة مفرومة واول مايغلوا ضيفى معلقة صلصة وتسيبيها نص ساعة تتسبك على نار هادية وفى الآخر ظبطى ملحك مع الكمون ورشة زنجبيل لو عاوزة

الشطة هتجيبى طاسة على النار وتحطى كبشة من الصلصة ومعاها ملعقة شطة بودرة ومعلقتين هريسة وتاخد غلوة واحدة بس وبعدين اطفى عليهم

قدمى الوصفة لكل اللى بتحبيهم بكل الحب وبالهنا والشفا